Vengriiadaǵy Qazaqstan stýdentteriniń elge kelýine eshqandai kedergi joq. Bul týraly QR Bas memlekettik sanitar dárigeri Aijan Esmaǵambetova aitty, dep habarlaidy QazAqparat.
«Áýe kemeleriniń ushyp kelý kestesinde Vizar áýe kompaniiasynyń Býdapesh -Nur-Sultan baǵytyndaǵy reisi 5 shilde kúni saǵat 21-35-te keletindigi josparlanǵan. Iaǵni, bizdiń tarapymyzdan Býdapesh qalasynan stýdentterdiń kelýine eshqandai shekteý qoiylmaidy», - dedi Bas sanitar dáriger Ortalyq kommýnikatsiialar qyzmetindegi brfing barysynda BAQ ókilderiniń saýalyna orai.
Sonymen qatar ol QR Bas memlekettik sanitar dárigeriniń 2020 jylǵy 24 maýsymdaǵy 42-qaýlysyna sáikes, elderdiń sanattaryna jáne halyqaralyq áýe reisimen keletin jolaýshylarǵa qatysty shekteý sharalary 3-sanatqa bólingenin aitty. Birinshi sanatqa Qytai, Ońtústik Koreia, Japoniia, Grýziia, Tailand, Vengriia, Úndistan, Germaniia, Chehiia, Malaiziia kiredi. Bul elden keletin jolaýshylardan tek termometriia men saýalnama alynady. Ekinshi sanatqa Túrkiia, Mysyr, Ýkraina, Polsha, Ózbekstan, Qyrǵyzstan, Tájikstan jáne úshinshi sanat elderinen turaqty emes evakýatsiialyq jáne charterlik reistermen keletin jolaýshylarǵa termometriia, saýalnama júrgiziledi. Bul rette 2-sanattan kelgen jolaýshylarda 5 táýlikten aspaityn ýaqyt ótken PTR-ádistemesimen zerthanalyq teris nátijesi bar anyqtamasy bolsa shekteýsiz júre alady.
«Al anyqtama bolmaǵan jaǵdaida ushyp kelgen kúnnen bastap 48 saǵat ishinde PTR testinen mindetti ótýi týraly habarlama beriledi nemese olar 14 kúnge úi karantinine ornalastyrylady», - dedi Aijan Esmaǵambetova.
