Rio-de-Janeiro Olimpiadasynyń kúmis júldegeri boksshy Vasilii Levit Riodan kelgennen keiin tilshilerge bergen suhbatynda daýǵa ainalǵan jekpe-jegine qatysty pikir bildirdi, - dep habarlaidy Vesti.kz.
"Tishenkomen qaitadan jekpe-jekke shyǵý men úshin qyzyq bolar edi. Jekpe-jekke shyǵyp júrgen barlyǵymyz kóshbasshylyq qasietke iemiz jáne árqashan jeńiske umtylamyz. Al eger jeńilip qalsań, ózińniń, ata-anańnyń, jankúierlerińniń aldyńda qaita kóterilýge tyrysasyń. Biraq jekpe-jektiń bolatyny nemese bolmaityny ýaqyttyń enshisinde", - dedi ol .
Rio Olimpiadasyndaǵy daýly jekpe-jegine qatysty boksshynyń jaýaby kelesidei boldy: "Qansha adam bolsa, sonsha pikir bolady. Men ony adam retinde túsinemin. Kim óz medalin bergisi kelsin. Qalai utqany mańyzdy emes, Olimpiadaǵa barǵandardyń barlyǵy jeńgisi keledi, qol jetkizgenine qýanady. Sondyqtan ol ne úshin maǵan medalin berýi kerek? Ol onyń medali. Men tipti almaityn da edim. Ne qajeti bar? Maǵan kúmis medal berdi. Ekinshi medaldi qaitemin?".
Munymen qatar, Levit kelesi Olimpiadaǵa qatysý-qatyspaýy týraly suraqqa bylai jaýap berdi: "Men bir aidan keiin ne bolaryn da bilmeimin, al tórt jyldan keiin tipti de. Qazir óz sharýalarymmen ainalysamyn, otbasylyq jaǵdailar bar degendei. Sodan keiin demalamyn, osydan keiin ǵana ózim unatqan baǵytta júremin", - dedi boksshy.
Boksshy kásipqoi boksqa aýysý máselesine kelgende oilanatynyn aitty.
Eske salaiyq, osyǵan deiin Olimpiadada qazaqstandyq boksshyVasilii Levit pen reseilik Evgenii Tishenkonyń finaldaǵy jekpe-jegine qatystyhalyqaralyq daý týǵan edi. Qazylar jeńisti Tishenkoǵa bergen kezde jankúierler bul sheshimge narazylyq bildirip, ysqyrǵan bolatyn. Jelide jekpe-jek qorytyndysyn qaita qaraý týraly petitsiia paida boldy. Al álemdik boks mamandary tóreshilerdiń ádil sheshim shyǵarǵanyna kúmán keltiretinin atap jatty.
