Búgin Astanada ótken «EKSPO-2017» Halyqaralyq mamandandyrylǵan kórmesin uiymdastyrý jáne ótkizý jónindegi Qoǵamdyq keńestiń úshinshi otyrysyna Qytaidyń «EKSPO-2017» pavilony jónindegi komissary Van Chinjen arnaiy beinejoldama arqyly óziniń usynystary men 2010 jyly Shanhaida ótken halyqaralyq kórmeni uiymdastyrý kezindegi tájiribesin joldady, deidi BAQ.kz tilshisi.
Qytai pavilonynyń komissary halyqaralyq shara uiymdastyrýda eń basty eskeretin jaǵdai áýejailar men vokzaldar ekenin alǵa tartady.
«Ózderińiz biletindei Shanhaida eki áýejai bar. Biz dúniejúzinen keletin 40 million týristti qabyldaý úshin áýeli áýejailardy qaita jóndeýden ótkizip, modernizatsiialadyq. Bul bizneske salmaq salǵanymen sol elge nemese qalaǵa eń áýeli taban tiregen adam eldiń mádenietin áýejaiynan tanidy» - deidi Van Chinjen.
EKSPO kórmesi arqyly óz eliniń týrizmin damytýdy kózdeýshiler úshin bul kórme úlken múmkindik degen qytailyq ókil qytai tarapynyń Astanada ótetin halyqaralyq kórmege qatysýǵa degen qulshynysy joǵary. Tipti, «EKSPO-2017» kórmesine qytaidaǵy memlekettiń damýynda qozǵaýshy kúsh bolyp tabylatyn úsh birdei uiymy arqyly qatysýǵa nietti ekendigin de jasyrmady.
«Biz Astanada ótetin kórmege Qytai Halyqaralyq saýdany ilgeriletý jónindegi keńes, Energetika ministrligi jáne Týrizm ministrligi sekildi qurammen qatyssaq deimiz. Onda 2010 jylǵy jaǵdaidy eske túsire otyryp, qytailyq tájiribeniń eń úzdik degen eki jobasyn kórermenderge usynbaqpyz. Biri – QHR memlekettik elektrojelileri korporatsiiasyna, kelesisi – Iadrolyq-energetika korporatsiiasyna tiesili jobalar. Bul bizdiń eldegi Astanadaǵy kórmege qatysqysy keletin kompaniialardyń ishindegi eń tańdaýlylary deýge bolady. Áitpese, Astanada 3 aiǵa sozylatyn kórmege óz ónimderin usynǵysy keletin qytailyq kompaniialar az emes. Al endi, biz usynys retinde ári sizderdi qoldaý maqsatynda roýd-shoý uiymdastyrýǵa daiynbyz» - dedi Van Chinjen arnaiy joldaǵan beinejoldaýynda.
Qytai pavilonnyń komissarynan bólek 2015 jyly Milan qalasynda ótken «EKSPO-2015» kórmesiniń Tóraǵasy, Milan qalasynyń meri Djýzeppe Sala da «EKSPO-2017» Halyqaralyq mamandandyrylǵan kórmesin uiymdastyrý jáne ótkizý jónindegi Qoǵamdyq keńestiń úshinshi otyrysyna arnap arnaiy bideojoldaý jibergen eken.
