QR Sanitarlyq-epidemiologiialyq baqylaý komitetiniń tóraǵasy Aijan Esmaǵambetova vaktsinalaý tym baiaý júrse, onyń saldary qandai bolatynyn aitty, dep habarlaidy QazAqparat.
COVID-19 indetin taratpaý jónindegi vedomstvoaralyq komissiianyń Telegram- kanalynda QR Sanitarlyq-epidemiologiialyq baqylaý komitetiniń tóraǵasy Aijan Esmaǵambetovanyń vaktsinalaý máselesi týraly suhbatynan úzindi jariialandy.
«Vaktsinalaýdy neǵurlym baiaý júrgizsek, virýstyń túrlenýine soǵurlym múmkindik beremiz. Al virýs neǵurlym jyldam túrlense, vaktsinanyń kúshi jetpeitin nemese áseri álsiz bolatyn indet túri paida bolý múmkindigi artady. Únemi aityp júrgenimizdei, bizdiń mindetimiz – virýstyń túlene túsýine jol bermeý úshin vaktsinatsiiany barynsha jyldam júrgizý», - degen komitet basshysy o basta ekpeniń tiimdiligine kúmándanýshylar kóp bolǵanyn eske aldy.
«Vaktsinatsiia jańadan bastalǵan kezde ekpeniń tiimdiligine senbeitinder kóp boldy. Al búgin vaktsinalaý bastalǵannan beri 8 ai ótkende bizdegi statistikalyq derekter vaktsinatsiianyń tiimdi ekenin kórsetip otyr. Vaktsinatsiia bastalǵan 1 aqpannan beri koronavirýspen aýyrǵandardyń 96 paiyzy ekpe almaǵan. Iaǵni, aýrý juqtyrǵandardyń 4 paiyzy ǵana ekpe alǵandar. Bul vaktsina tiimdi jumys istep jatyr degen sóz. Bizdiń mindetimiz – virýstyń ekpege yryq bermeitin túri paida bolýyna jol bermeý», - dedi Aijan Esmaǵambetova.
