Dárilik zattar men meditsinalyq buiymdardy ulttyq saraptaý ortalyǵynyń úilestirýshisi, meditsina ǵylymdarynyń kandidaty Sáýle Búrkitbaeva vaktsina sapasy qalai tekseriletinin túsindirdi, dep habarlaidy QazAqparat.
«Vaktsinany tekserý aldynda sarapshylarymyz vaktsina shyǵaratyn óndiriske baryp, jabdyqtaryn, múmkindikterin, barlyq jaǵdaiyn standarttar men algoritmder boiynsha tekseredi. Munan soń sarapshylar vaktsinaǵa bergen qujattardyń, iaǵni epidemiologiialyq tiimdiligin, immýnogendik qasietterin, klinikaǵa deiingi klinikalyq zertteýlerdiń, tirkeýden keiingi zertteýlerdiń nátijesine berilgen málimetterdi dáleldeitin qujattarǵa taldaý jasap tekseredi. Sodan keiin baryp bizdegi ulttyq jáne halyqaralyq standarttar boiynsha akkreditatsiiadan ótken Dárilik zattar men meditsinalyq buiymdardy ulttyq saraptaý ortalyǵynyń zerthanalarynda taǵy da tekserýden ótedi», - dedi ol.
Sarapshynyń atap ótýinshe, atalǵan zertteýlerdiń qorytyndysyna súiene otyryp, memlekettik ýákiletti organ vaktsinany tirkeý týraly kýálik berýge sheshim qabyldaidy.
Qazirgi tańda memlekettik dárilik zattar men meditsinalyq buiymdardyń tiziminde Belgiia, Frantsiia, Niderlandy, Resei, Qytai, Úndistan, Koreia jáne Izrail syndy elderdiń iri óndirýshileriniń 64 vaktsinasy tirkelgen. Onyń ishinde M.Aiqynbaev atyndaǵy karantindik jáne zoonozdyq juqpalar Qazaq ǵylymi ortalyǵynda jasalǵan bir otandyq vaktsina bar.
«Vaktsina Qazaqstanǵa jetkizilgennen keiin de ári qarai zertteý júrgiziledi. Vaktsinany qoldaný kezindegi jaǵymsyz áseri týraly málimetter jinaqtalatyn, taldanatyn ári baǵalanatyn farmakologiialyq baqylaý jáne olardy qaýipsiz qoldanýdy baqylaý júiesi jumys isteidi. Iaǵni, vaktsina Qazaqstanǵa kelgennen keiin onyń ár seriiasyna, toptamasyna baqylaý júrgizilip otyrady. Monitoring barysynda bolatyn jaǵymsyz reaktsiialar, barlyq anyqtalǵan jaǵdailar taldanady», - dedi Sáýle Búrkitbaeva.
Onyń atap ótýinshe, vaktsinany qoldanǵan kezde bolatyn janama jaǵymsyz áserler nusqaýlyqta tolyq jazylady.
«Taǵy bir aityp ketetin jait, Qazaqstandaǵy vaktsinanyń basym kópshiligi - Dúniejúzilik densaýlyq saqtaý uiymynyń dárilik zattar prekvalifikatsiiasynan ótken, tiisti óndiristik standarttarǵa sáikes jasalǵan vaktsinalar»,- dedi ol.
