Almaty Ftiziopýlmonologiia ortalyǵynyń juqpaly aýrýlar bóliminiń meńgerýshisi, ftiziohirýrg, pýlmonolog Abzal Malbasqanov el arasynda taraǵan «ushaqpen virýs shashty» degen áńgimege qatysty túsinik berdi, dep habarlaidy QazAqparat.
Onyń aitýynsha, el arasynda taraǵan «ushaqtarmen virýs shashty» degen áńgime shyndyqqa janaspaidy.
«Keibir adamdar jalǵan aqparat taratýǵa qumar. Ushaqpen, tikushaqpen virýs shashyp ketipti degen aqparat áleýmettik jelide kóptep taratylyp jatyr. Bul adamnyń aqylyna da syimaidy. Bul suraqqa eýropalyq ǵalymdar birden jaýap bergen. Jer betindegi koronavirýs infektsiiasynyń barlyǵyn jinaǵannyń ózinde jalpy salmaǵy 1 kelige jetpeidi. Ony barlyq óńirge qalai seýip shyǵýǵa bolady?», -dedi Malbasqanov.
Maman sondai-aq, dezinfektsiialyq quraldar pnevmoniia týdyrady degen aqparatqa túsinik berdi.
«Dezinfektsiialyq quraldar pnevmoniia emes, allergiia týǵyzýy múmkin», - dedi ol.
Sonymen qatar, ol pnevmoniiaǵa shaldyqqan adamdarǵa monshaǵa nege barýǵa bolmaityndyǵyn túsindirdi.
«Pnevmoniiaǵa shaldyqqan naýqastarǵa 2-3 ai monshada býǵa túsýge bolmaidy. Sebebi ystyqta atmosferalyq qysym kóterilip, júrek-qan tamyrlaryna, tynys alý júiesine keri yqpal etýi múmkin», - dedi ol.
