Foto: sxodim.com
Naýryz – qazaq halqy úshin jańarý men jaqsylyqtyń bastaýy sanalatyn erekshe mereke. «Ulystyń uly kúni» dep atalatyn bul kúnde adamdar bir-birine aq tilekter aityp, úlkenderden bata alady. Qazaq dástúrinde bata – tek tilek qana emes, urpaqqa baǵyt-baǵdar beretin rýhani ósiet, izgi niettiń belgisi.
Ásirese Naýryz merekesinde aitylǵan bata erekshe mánge ie. Aqsaqaldar men aq jaýlyqty ájeler jastarǵa bereke, birlik, amandyq tilep, el men jerdiń tynyshtyǵyn suraidy. Mundai batalar adamdardy jaqsylyqqa úndep, jańa jyldy úmitpen qarsy alýǵa shaqyrady. Osy oraida Naýryz merekesinde jii aitylatyn eń áserli 10 Naýryz batasyn nazarlaryńyzǵa usynamyz.
1. Naýryz batasy
Ulystyń uly kúni qutty bolsyn,
Aq mol bolyp, baq qonsyn.
Qydyr ata qydyryp,
Ár shańyraqqa yrys qonsyn.
Qaiǵy bulttai seiilsin,
Qýanysh kóldei jaiylsyn.
Elimiz aman, jurtymyz tynysh,
Jerimizge bereke jaiylsyn.
Áýmin!
2. Bereke batasy
Armysyń, áz Naýryz!
Jerge nur, elge qut ákel.
Ár úidiń oty mazdap,
Ár shańyraqta baqyt ornasyn.
Yrysymyz tasyp,
Dáýletimiz assyn.
Birligimiz bekem,
Tirligimiz kórkem bolsyn.
Áýmin!
3. Dastarhan batasy
Aqqa tolsyn qazanymyz,
Berekege tolsyn qoramyz.
Dastarhanymyz keń bolyp,
Yrysymyz teń bolsyn.
Naýryz kóje bereke bop,
Jyl boiyna násip bolsyn.
Baq-dáýlet ornap,
Qýanyshymyz arta bersin.
Áýmin!
4. Elge arnalǵan bata
Ulys kúni uly bolsyn,
Aq mol bolsyn.
Elimiz tynysh,
Jurtymyz aman bolsyn.
Tórt túlik ósip,
Qoi ústine boztorǵai jumyrtqalaǵan
Zamandy kóreiik.
Jerimizge bereke,
Elimizge mereke bolsyn.
Áýmin!
5. Jastarǵa arnalǵan bata
Jastarymyz jalyndy bolsyn,
Joldary árdaiym ashyq bolsyn.
Armandary asqaq,
Maqsattary biik bolsyn.
Eline qyzmet etetin
Parasatty azamat bolsyn.
Ulys kúni bastalǵan
Jaqsylyqtaryń jyl boiy jalǵassyn.
Áýmin!
6. Qydyr ata batasy
Qydyr ata joldasyń bolsyn,
Baq pen dáýlet qoldasyń bolsyn.
Ár kúniń shattyqqa tolyp,
Ár isiń sátti bolsyn.
Naýryzdyń nury tógilip,
Jyl boiy bereke bersin.
Áýmin!
7. Birlik batasy
Bereke-birlik ornasyn,
Aǵaiyn arasy jarassyn.
Dostyqtyń týy biiktep,
Tatýlyqtyń baǵy jansyn.
Ulystyń uly kúninde
Jaqsylyq ár úige qonsyn.
Áýmin!
8. Yrys batasy
Yrysymyz mol bolsyn,
Dáýletimiz kól bolsyn.
Qaida barsaq jol bolyp,
Qýanyshymyz kóp bolsyn.
Naýryzdyń shýaqty kúni
Ár júrekke nur bolsyn.
Áýmin!
9. Otbasy batasy
Ár shańyraq shattyqqa tolsyn,
Ár otbasy baqytqa qonsyn.
Ata-ana aman bolyp,
Balalardyń baǵy ashylsyn.
Naýryz kelgen osy kúni
Úilerińe qut qonsyn.
Áýmin!
10. Ulys batasy
Ulys oń bolsyn,
Aq mol bolsyn.
Jylymyz jaily,
Tirligimiz saily bolsyn.
Baq-bereke ornap,
Qýanyshymyz arta bersin.
Áz Naýryz ár shańyraqqa
Qut-bereke ákelsin.
Áýmin!
