QR Strategiialyq josparlaý jáne reformalar agenttigi Ulttyq statistika biýrosynyń basshysy Nurbolat Aidapkelov Túrkistan oblysynyń Ulttyq sanaqqa daiyndyq jumystarymen tanysty, dep habarlaidy "Ult aqparat".
Ulttyq statistika biýrosynan málim etkendei, eń aldymen ol Ózbekstanmen shekaralas turǵan Jetisai aýdanyna bardy. Onda qazir 4 instrýktorlyq ýchaske jumys isteýde. Sondai-aq, Biýro tóraǵasy Maqtaaral, Keles jáne Saryaǵash aýdandaryna baryp, ondaǵy jaǵdaidy kózimen kórip qaitty.
Sanaqqa daiyndyq kezeńinde turǵyn úilerdiń (páterlerdiń) jáne turǵyn úi retinde paidalanylatyn turǵyn emes orynjailardyń tizimi naqtylanýda. Bul, negizgi kezeńdi júrgizý úshin qajet. Sol arqyly halyq sanaǵynyń negizgi kezeńinde sanaq qyzmetkerlerine beriletin júktemeniń mólsherge sai bolýy, halyq sany men aýmaqtyń nusqaýshylyq jáne tirkeý ýchaskeleriniń teń bólinýi qamtamasyz etiledi.
Túrkistan oblysynda 50 nusqaýshylyq ýchaske qurylǵan. Ulttyq sanaqqa daiyndyq jáne ótkizý jónindegi nusqaýshylarmen (ýákil 126 adam) eńbek kelisimsharty jasalǵan. Sondai-aq, nusqaýshy-baqylaýshylarmen, interviýerlermen aqyly qyzmet kórsetý kelisimsharty jasaldy. 522 adamnan turatyn barlyq qyzymetkerler (126 ýákiletti, 50 nusqaýshy-baqylaýshy, 346 interviýer) tájiribelik oqý-jattyǵýdan jáne odan keiin Statistika departamentiniń bazasynda testileýden ótken.
Interviýer retinde basqa qyzmet túrlerinen bosatylǵan barlyq niet bildirýshiler erikti negizde qabyldanǵan.
«Qazirgi ýaqytta barlyq sanaq qyzmetkerleri tolyqtai orynjaimen, kompiýtermen, jihazben qamtylǵan. Kompiýterler Memlekettik organdardyń biryńǵai kólik ortalyǵyna (MO BKO) qosylǵan. Árbir qyzmetker jeke qorǵanys quraldarymen qamtylǵan. Qalalyq qoǵamdyq kólikte tegin júrý máselesi sheshilgen. Árbir nusqaýshylyq ýchaskege ýchaskelik politsiia inspektory bekitildi», - delingen vedomstvo habarlamasynda.
Aldyn ala málimetter boiynsha Túrkistan oblysynda interviýerler 370 423 túrǵyn jáne adamdar turýy múmkin turǵyn emes orynjailardy aralaýǵa mindetti.
2021 jyldyń Ulttyq sanaǵynyń negizgi kezeńi 1 qyrkúiek pen 30 qazan aralyǵynda júredi. Oǵan onlain rejiminde de, dástúrli tásilmen de qatysýǵa bolady.
