Qazaqstan Ulttyq Olimpiada komiteti aýyr atletika sportshylarynyń tólenbegen jalaqylaryna bailanysty videohabarlamasyna qatysty túsinik berdi. Bul týraly "Ult aqparat" Olympic.kz saityna silteme jasap habarlaidy.
«Qazaqstan UOK óz tarapynan búginde barlyq ulttyq qurama múshelerine, sonyń ishinde, aýyr atletshilerge de eńbekaqylaryn tolyq jáne ýaqytyly tólep otyr. Sportshylar úshin UOK eńbekaqysy birden bir tabys kózi bolyp sanalady. Basqa qarjylandyrý kózderi pandemiiaǵa bailanysty ózderiniń biýdjetterin qysqartty. Atap aitqanda, demeýshiler tarapynan eńbekaqy alatyn ulttyq quramanyń keibir múshelerine tólenbeý týraly másele bar. Bul is júzinde bárimizge ortaq másele. Búgingi tańda barlyq múddeli taraptar jaǵdaidy sheshý úshin jumys isteýde», - deidi Qazaqstan UOK bas hatshysy Andrei Kriýkov.
Sondai-aq, bas hatshy UOK sport federatsiialary men sportshylar aldyndaǵy barlyq mindettemelerin oryndaitynyn jáne qazirgi ýaqytta oqý-jattyǵý jiynyn kezeń-kezeńimen qaita jandandyrýǵa kóńil bólip otyrǵandyǵyn atap ótti. Oqshaýlaý rejiminde oqý-jattyǵý jiynyn qaýipsiz ótkizý jáne baqylaý maqsatynda Qazaqstan UOK tarapynan arnaiy jedel shtab qurylǵanyn da tilge tiek etti. Tótenshe jaǵdai rejimi alynyp tastalǵannan keiin «Qazaqstan Respýblikasy turǵyndary arasynda koronavirýs infektsiiasynyń aldyn alýǵa bailanysty is-sharalardy ári qarai qataldatý» týraly Qaýlysyna sai sanitarlyq-dezinfektsiialy rejimdi qatań saqtai otyra UOK akkreditatsiiadan ótken 29 sporttyq bazany jańa talaptarǵa sáikes daiyndady. 25 sporttyq nysan oqý-jattyǵý jiyndaryn ótkizýge ruqsat aldy. Taǵy tórt sporttyq baza UOK erejeleri men sanitarlyq dárigerdiń jarlyǵymen óz nysandaryn qalypqa keltiredi. Aita keterligi, búginde boks jáne dziýdodan áielder men erler ulttyq qurama komandalary oqý-jattyǵý jiyndaryna kiristi.
Sonymen qatar, sý doby men qazirgi bessaiys boiynsha ulttyq qurama komanda jattyǵýyn jalǵastyrýda. Osy aptada qysqy sport túrleri boiynsha komanda ókilderiniń jattyǵý jiyndary bastalady dep kútilýde. Basqa da olimpiadalyq sport túrlerinen komandalar bekitilgen keste boiynsha jattyǵý kezeńderin bastaidy.
Sondai-aq, Andrei Kriýkov ulttyq quramanyń oqý-jattyǵý jiyndarynyń shyǵyndary men basqa da qarjylyq mindettemeleri memlekettik tapsyrma boiynsha UOK tarapynan ýaqytyly jáne tolyq kólemde oryndalatyndyǵyn atap ótti.
