Jetim balalarǵa túbegeili jańa kózqaras qalyptastyratyn tujyrymdama daiyndaý qajet. Bul týraly Ulttyq qoǵamdyq senim keńesiniń múshesi Ýais Ersaiynuly aitty, dep habarlaidy QazAqparat.
«Ulttyq keńes aiasynda qozǵaiyn dep otyrǵan taǵy bir úlken máselemiz - jetim jáne ata-ananyń qamqorlyǵynsyz qalǵan balalardyń jai-kúii. Qazir Qazaqstanda mundai balalardyń jalpy sany 23 myńnan astam ekeni belgili. Memleket atalǵan topty óz qamqorlyǵyna alyp, 18 jasqa deiin balalar úiinde oqytyp, baǵyp-tárbieleýdi moinyna alǵanyn bilemiz. Alaida sol balalar úiiniń túlekteriniń 90 paiyzy memleketke jat, qoǵamǵa ógei bolyp ósip shyǵyp jatyr. Túlekterdiń baspanamen qamtylýy óte tómen deńgeide bolsa, jumyssyzdyq óte joǵary. Bul jastar arasynda ajyrasý, urys-keris, qylmys óte joǵary. Problema nede? Osyǵan tereń úńilýimiz qajet. Menińshe, bul balalar úii qabyrǵasynan bastalǵan másele. Biz eń áýeli jetim degen uǵymnyń ózinen arylýymyz kerek. Osy anyqtamanyń ózi balalardy ógeisitip, keýdeden iterip, shettetý bolyp sanalady», - dedi keńes múshesi Ulttyq qoǵamdyq senim keńesiniń 6-otyrysynda.
Osy rette ol jetim deýdiń ornyna memleket pen qoǵam qamqorlyǵyndaǵy balalar dep ataýdy usyndy.
«Sonda ǵana olar ózderin qoǵamnyń tolyqqandy múshesi retinde sezine alady. Másele ataýyn ózgertýmen ǵana sheshilmeidi. Balalar úiiniń qabyrǵasynan bastap qorǵaýdaǵy balalardy qoǵamǵa beiimdep, ómirge ikemdep, áleýmettendirý qajet. Dál qazir mundai jumysty eshkim júrgizip otyrǵan joq. Memlekettiń kómegi tek materialdyq igiliktermen shektelýde. Sonymen birge balalar úiine kómekti piar úshin paidalanýǵa tyiym salý qajet. Balalardyń rýhani qajettiligin qamtamasyz etýge tiisti institýttar óz qyzmetterin múldem oryndamai otyr. Budan basqa, memleket pen qoǵam qamqorlyǵyndaǵy balalardyń eń úlken máselesi – mektep bitirgen soń turǵyn úi men jumys. Biz balalarǵa jastaiynan materialdyq igiliktermen kómektesý arqyly infantildi, marginaldy topqa ainaldyryp jatqanymyzdy moiyndaýymyz qajet», - dedi Ýais Ersaiynuly.
Onyń atap ótýinshe, qoǵamda atalǵan balalardy óz perzentim dep qabyldaityn túbegeili jańa kózqarasty qalyptastyratyn tujyrymdama daiyndalyp, arnaýly baǵdarlama qabyldan durys bolar edi.
