Ulttyq qoǵamdyq senim keńesiniń músheleri 1 maýsymda Soltústik Qazaqstan oblysynda boldy. Bul týraly QR Prezidentiniń kómekshisi Erlan Qarin jelidegi paraqshasynda jazdy, dep habarlaidy "Ult aqparat".
«Ulttyq qoǵamdyq senim keńesiniń bir top músheleri Rauan Kenzhekhan, Marat Shibýtov, Gýlmira Ileýova, Andrei Chebotariov Soltústik Qazaqstan oblysynda qoǵam ókilderimen kezdesip, Prezident bastamalaryn júzege asyrý barysyn talqylady. Sapar barysynda Ulttyq keńes músheleri oblystyń qoǵamdyq keńes múshelerimen kezdesip, eldi-mekenderdi infraqurylymdyq nysandarmen, sý júiesimen qamtamasyz etý, ishki jáne syrtqy kóshi-qon, sondai-aq, qoǵam ókilderi men jergilikti organdardyń ózara qarym-qatynas máselelerin talqylady», - dep jazdy E. Qarin.
Sonymen qatar, Ulttyq keńes músheleri Qyzyljar jáne Mamliýt aýdandaryna bardy. Qyzyljar aýdanynda ótken aýyldyq okrýg ákimderimen kezdesýde aýyl ákimderin tikelei sailaý naýqanyna daiyndyq barysy, aýdannyń aýyldyq okrýgterin damytý máseleleri sóz boldy.
«Budan bólek, Ulttyq keńes músheleri Peterfeld aýylynda ornalasqan «Qyzyljar Abai orta mektebine» bardy. Mektep kúrdeli jóndeýden ótip, zaman talabyna sai jabdyqtalǵan. Sondai-aq, munda bilim berý mazmuny men ádisteri qaita qarastyrylyp, ustazdarǵa qoldaý kórsetýdiń jáne olardy yntalandyrýdyń tyń tásilderi ázirlengen.
Ulttyq keńes músheleri Mamliýt aýdanynda elimizdiń ońtústiginen soltústikke kóshirý bastamasy aiasynda qonys aýdarǵan aýdan turǵyndarymen kezdesti. Olar Soltústik Qazaqstan oblysyna qalai kóship kelgendigi týraly tájiribesin ortaǵa saldy. Kezdesýdiń qorytyndysy boiynsha keńes músheleri ishki kóshi-qon máselelerin Ulttyq keńestiń jumysy aiasynda muqiiat qarastyrýdy ýaǵdalasty.
Ulttyq keńes músheleri oblystaǵy sarapshylarmen jáne ǵalymdarmen de júzdesti. Kezdesýde bilim berý, óńirlik ǵylymi zertteýler júrgizý ádis-tásilderi, ǵalymdardyń biznes jáne memlekettik organ ókilderimen bailanys máseleleri áńgimege ózek boldy.
Stýdenttermen jáne jastar birlestikteriniń belsendilerimen ótken kezdesýde bilim alý úshin kóship kelý, jastardy jumyspen qamtý jáne olarǵa qoldaý kórsetetin jobalardy júzege asyrý máseleleri talqylandy.
Sapar barysynda Ulttyq keńes músheleri qoǵam ókilderine, ǵalymdar men jastarǵa Prezident bastamalaryn júzege asyrý barysyn áńgimelep berdi. Sonyń ishinde, sailaý zańnamasyna engizilgen tyń ózgerister týraly aitty.
Ulttyq qoǵamdyq senim keńesi músheleriniń óńirlerge issapary jalǵasady. Aldaǵy ýaqytta Qaraǵandy oblysyna barý josparlanyp otyr», - dep tolyqtyrdy QR Prezidentiniń kómekshisi.
