Resei Ýkrainanyń Zmeinyi aralynan áskeriniń qalǵan bóligin áketti, - dep habarlady Ýkraina kúshteriniń "Ońtústik" toby basshylyǵy Facebook-tegi paraqshasynda.
Aqparatta reseilikterdiń araldan "garnizonnyń qalǵan bóligin eki qaiyqpen asyǵys-úsigis áketkeni" aitylǵan. Ýkraina jaǵy qazir aralda jarylys estilip, órt bolyp jatyr dep habarlady.
Keiinirek Resei qorǵanys ministrligi Zmeinyi aralynan áskerin áketkenin rastady. Ministrlik "Zmeinyi aralyndaǵy tapsyrmany aiaqtap, izgi erik-jiger qadamy retinde ondaǵy garnizondy shyǵarǵanyn" málimdegen.
"Osylaisha Resei federatsiiasy BUU-nyń Ýkraina aýmaǵynan aýyl sharýashylyǵy ónimderin shyǵarý úshin gýmanitarlyq dáliz uiymdastyrý jónindegi kúsh-jigerine kedergi keltirmeitinin álem qaýymdastyǵyna pash etti" degen ministrliktiń sózin keltiredi "Interfaks" agenttigi.
Resei kúshteri Ýkrainaǵa basyp kirgen kúni – 24 aqpanda Zmeinyi aralyn jaýlap alǵan. Mamyr aiynda Resei qorǵanys ministrligi aralǵa túsýge talpynǵan ýkrain desantshylaryn joiǵanyn habarlaǵan. Ýkraina jaǵy aral mańynda Reseidiń birneshe kemesine soqqy bergenin aitqan. 17 maýsymda Ýkraina áskeri-teńiz kúshteri aralǵa oq-dári, qarý-jaraq pen áskerilerdi apara jatqan reseilik "Vasilii Beh" kemesin teńizge batyrǵanyn málimdegen.
Qara teńizdiń soltústik-batysynda ornalasqan Zmeinyi araly Ýkrainanyń Odessa oblysy jaǵalaýy men Odessa qalasynyń portyna baratyn teńiz jolyn baqylaýda ustaý úshin mańyzdy nysan sanalady.
