Qasym-Jomart Toqaev pedagogterdiń tamyz konferentsiiasynda mekteptegi bilim berý júiesine qatysty birneshe máseleni kóterdi. Ol oqýlyqtardyń sapasy men ádebiet mazmunynan bastap, Nazarbaev Ziiatkerlik mektepteri men jekemenshik mektepterdegi oqý merzimine deiin sóz qozǵady, dep habarlaidy Ult.kz.
Mektep oqýlyqtarynda 700-den astam qate anyqtalǵan
Memleket basshysy mektep oqýlyqtary sapasyn synǵa alyp, tarihi derekteri shyndyqqa sáikes kelmeitin materialdardy qaita qaraýdy talap etti. Prezidenttiń aitýynsha, oqýlyqtardan 700-den astam eleýli qate anyqtalǵan.
«Oilanyp kórińizdershi, oqýlyqtarda 700-den astam qate bar!» – dedi Qasym-Jomart Toqaev.
Prezident sondai-aq oqýshylarǵa tarihi derektiligi kúmán týdyratyn keiipkerler men erlikter týraly aitylatyn jaǵdailarǵa nazar aýdardy. Onyń pikirinshe, patriottyq tárbie jalǵan nemese burmalanǵan málimetterge negizdelmeýi kerek. Sebebi uzaq merzimdi perspektivada bul qoǵamǵa ziian keltirýi múmkin.
«Muń-qaiǵy – jastarymyzǵa serik emes»
Toqaev ádebiet pen mádeniettiń mazmunyna da toqtalyp, muńǵa jáne «máńgi qaiǵyratyn ult» beinesine shamadan tys mán berilip júrgenin aitty.
«Muń-qaiǵy – jastarymyzǵa jaman serik. «Muń-qaiǵy» bizdiń jastarymyzǵa jaraspaidy», – dedi prezident.
Memleket basshysynyń aitýynsha, mádeni jáne bilim berý ortasy tarihtyń kúrdeli kezeńderin ǵana kórsetip qoimai, jastardyń bolashaqqa degen senimin qalyptastyrýy kerek.
NZM-degi 18 jastaǵy oqýshylardyń oqýyn qaita qaraý usynyldy
Prezident Oqý-aǵartý ministrligine Nazarbaev Ziiatkerlik mektepteri men keibir jekemenshik mektepterde 18 jastaǵy oqýshylardyń bilim alý qajettiligin zerdeleýdi usyndy.
«NZM men jekemenshik mektepterdegidei, mektepte on segiz jastaǵy jasóspirimderdi ustaý qanshalyqty durys? Qazirgi balalardyń fizikalyq turǵydan jedel damyp kele jatqanyn eskersek, bul qanshalyqty oryndy?», – dedi Toqaev.
Bul rette prezident qoldanystaǵy júieni joiý týraly aitqan joq. Ol jaýapty ministrlikke máseleni taldap, ony sheshýdiń yqtimal joldaryn usynýdy tapsyrdy.
Toqaev mekteptegi bilim berýdiń biryńǵai standarty qajet ekenin de atap ótti. Sondai-aq orta jáne tehnikalyq-kásiptik bilim berý júiesine jasandy intellektini qoldanýdy retteitin standarttardy engizýdi tapsyrdy.
Astanada qazaq-qytai jasandy intellekt mektebi ashylýy múmkin
Taǵy bir bastama retinde prezident Astanada qazaq-qytai jasandy intellekt mektebin qurý múmkindigin qarastyrýdy usyndy. Onyń aitýynsha, mundai mektepti ashý kezinde Qytaidyń zamanaýi tehnologiialar salasyndaǵy tájiribesi men jetistikterin paidalanýǵa bolady.
Memleket basshysy mektepten bastap tehnikalyq jáne kásiptik bilim berýge, odan ári ýniversitetterde mamandar daiarlaýǵa deiingi biryńǵai bilim berý júiesin qalyptastyrý qajettigin atap ótti.
