Foto: Ratel.kz
Úkimet Memleket basshysy Qasym-Jomart Toqaevtyń tapsyrmalaryn júzege asyrý aiasynda 2026–2030 jyldarǵa arnalǵan boksty damytý tujyrymdamasyn bekitti. Tiisti qaýlyǵa Premer-ministr Oljas Bektenov qol qoidy, dep habarlaidy Ult.kz.
Elimizde bokstyń damýy sapaly jańa deńgeige kóterilýde. Sala úshin strategiialyq mańyzy bar qujattyń negizgi maqsaty – bokspen shuǵyldanatyn azamattar sanyn kóbeitý, sportshylar daiarlaý sapasyn jáne qazaqstandyq boksshylardyń halyqaralyq arenada básekege qabilettiligin arttyrý.
Tujyrymdama negizgi 6 bólimdi jáne salany damytýdyń barlyq baǵytyn qamtidy. Olardyń ishinde kelesi 5 basym baǵyt bar:
- • boks infraqurylymyn damytý;
- • buqaralyq sportty keńeitý jáne sport rezervin qalyptastyrý;
- • ǵylymi-ádistemelik jáne meditsinalyq súiemeldeý isin jetildirý;
- • jattyqtyrýshylar men tóreshilerdiń biliktiligin arttyrý;
- • halyqaralyq yntymaqtastyq pen kásibi boksty damytý.
Qoiylǵan mindetterdi júzege asyrý tetigi 31 is-sharany qamtityn bekitilgen keshendi jospardan turady. Bul sharalar salanyń ózekti mindetterin júieli túrde sheshýge jáne naqty nátijelerge qol jetkizýge baǵyttalǵan.
Búgingi tańda Qazaqstanda bokspen 153 myńnan astam adam ainalysady, olarmen elimizdiń barlyq 20 óńirinde 2 myńnan astam jattyqtyrýshy jumys isteidi.
Ulttyq quramada 595 sportshy bar, olar – negizgi, jastar, balalar jáne jasóspirimder komandalary.
Ótken jyldyń qorytyndysy boiynsha 39 myńnan astam bala balalar-jasóspirimder sport mektepterinde bokspen ainalysýda, olardy 1 385 bapker baýlýda.
2030 jylǵa qarai bokspen ainalysatyndardyń sanyn kóbeitý, daiyndyq júiesiniń tiimdiligin arttyrý jáne qazaqstandyq sportshylardyń álemdik deńgeidegi pozitsiiasyn nyǵaitý josparlanýda.
Tujyrymdamany júzege asyrý salanyń júieli damýyna jańa serpin bermek jáne otandyq sportty damytýda, jastar arasynda salamatty ómir saltyn nasihattaýda, sondai-aq halyqaralyq arenada eldiń imidjin nyǵaitýda mańyzdy qadam bolmaq.
