Ulttyq testileý ortalyǵy UBT-ǵa daiyndalýǵa arnalǵan tegin onlain sabaqtar ótkizip jatyr, dep habarlaidy "Ult aqparat" Bilim jáne ǵylym ministrliginiń baspasóz qyzmetine silteme jasap.
Atalmysh ortalyq Ulttyq biryńǵai testileýdi uiymdastyrýmen jáne ótkizýmen ainalysady.
Onlain sabaqtar iri respýblikalyq bilim berý ortalyqtarymen birlesip ázirlendi. Sabaqtar bilim berý ortalyqtarynyń YouTube arnalarynda tikelei efirde ótkiziledi. Onlain sabaqtardyń barlyq efiri talapkerler kez-kelgen ýaqytta kóre alaýy úshin saqtalady.
«Ministrlik testileý kezinde ǵana emes, onyń bastalýyna deiin de qolaily jaǵdai jasaý úshin jumys júrgizip jatyr. Túlekterdiń UBT-ǵa daiyndyǵyn Ulttyq testileý ortalyǵy bilim berý ortalyqtarymen birlesip ekinshi jyl ótkizip otyr. Ótken jyly 376 saǵat onlain sabaqtar ótkizildi. Oǵan elimizdiń barlyq óńirleriniń mektep túlekteri qatysty. Olar qazaq tili, qazaq ádebieti, Qazaqstan tarihy, matematika, himiia, biologiia, fizika, geografiia jáne basqa da pánder boiynsha daiyndyqtan ótti. Biyl ótken jylmen salystyrǵanda túlekterdi qabyldaý emtihandaryna daiyndaýǵa qatysyp jatqan bilim berý ortalyqtary men onlain-platformalar sany artty. Joba biýdjet qarajatyn jumsamai iske asyrylǵanyn atap ótkim keledi», — dedi QR BǴM Ulttyq testileý ortalyǵynyń direktory Rýslan Emelbaev.
Osylaisha, Ulttyq testileý ortalyǵy men iri bilim berý ortalyqtary túlekterge emtihanǵa sátti daiyndalýǵa kómektesedi. Talapkerlerge arnalǵan onlain-sabaqtar osy oqý jylynyń sońyna deiin jalǵasady.
Tegin onlain sabaqtar myna keste boiynsha ótkiziledi:
- Qazbilim ortalyǵy «Qazbilim.tv» Youtube kanalynda tikelei efirde qazaq tilinde kún saiyn saǵat 20.00-de (Nur-sultan qalasynyń ýaqyty boiynsha);
- Educon Dostyk «DostyQbilim» YouTube arnasynda tikelei efirde ár seisenbi kúni saǵat 19.00-de qazaq tilinde, saǵat 20.00-de orys tilinde;
- Zerdeli-ár seisenbi men beisenbi kúnderi saǵat 20.00-de «Zerdeli.kz» YouTube arnasynda;
- Sabaq online ár senbi saiyn saǵat 15.00-de «Sabaq online» YouTube arnasynda;
- Samga juma kúni saǵat 20.00-de «Samga online» YouTube arnasynda;
- Daryn online ár seisenbi, sársenbi, beisenbi jáne juma kúnderi saǵat 18.00-de «Daryn online» YouTube arnasynda tikelei efirde daiyndyq sabaqtaryn ótkizedi.
