Ulttyq testileý ortalyǵynyń direktory Didar Smaǵulov biyl UBT-ny stadiondarda ótkizý usynysy nege qoldaý tappaǵanyn túsindirdi, dep habarlaidy QazAqparat.
Onlain rejimde ótken baspasóz máslihatynda Ulttyq biryńǵai testileýdi stadionda nemese onlain formatta ótkizý múmkindigi týraly suraldy.
«Biz stadionda ótkizý jaǵyn qarastyrǵan bolatynbyz. Zertteýler nátijesinde, stadionda bir kúnde 500-600 adam jinalatyny, al aýditoriiada 15-25 adam otyratyny anyqtaldy. Osy kórsetkishterdi alyp qarasaq, UBT-ny aýditoriiada ótkizý qaýipsiz bolyp otyr» - dedi D. Smaǵulov Ortalyq komýnikatsiialar qyzmetinde.
Osy oraida ol aýditoriialar tek 50 paiyzǵa ǵana toltyrylatynyn, sáikesinshe qaýiptilik deńgeii tómendeitinin atap ótti.
Budan buryn habarlanǵandai, Didar Smaǵulov biylǵy UBT-ny ótkizý tártibi jaiynda túsinik berdi.
Karantindik shekteýlerge bailanysty eldiń barlyq aimaqtaryndaǵy UBT ótkizý oryndarynda kúsheitilgen meditsinalyq-sanitarlyq sharalar engiziledi. Ǵimaratqa kirgizý kezinde test tapsyrýshylardyń arasyndaǵy eki metrlik araqashyqtyqty qatań saqtaý arqyly maskaly rejim júzege asyrylady. Ár test tapsyrýshy 5 baqylaý kezeńinen ótetin bolady, onyń ishinde syrtqy kiimdi dezinfektsiialyq eritindilermen zalalsyzdandyratyn arnaiy dáliz arqyly ótý eskerilgen.
«Ár qabattaǵy dálizderde sanitaizerler ornatylady. Aýditoriiada test tapsyrýshylardy otyrǵyzý keminde eki metr araqashyqty saqtaý arqyly júzege asyrylady. Bul rette aýditoriia únemi jeldetiledi», - dedi Didar Smaǵulov.
