Ulttyq testileý ortalyǵynyń direktory Didar Smaǵulov Ulttyq biryńǵai test ótkizýge daiyndyq barysyndaǵy kemshilikterdi aitty, dep habarlaidy QazAqparat.
«Jalpy, barlyq Ulttyq biryńǵai test ótkizý pýnktteri daiyn dep aitýǵa bolady. Biraq, birneshe kemshilik bar. Mysaly, onlain transliatsiia uiymdastyrý úshin biz 2 jolyn qarastyrdyq. Bir transliatsiiany jergilikti atqarýshy organdar jáne biz bir transliatsiia uiymdastyramyz. Óitkeni, bir transliatsiiada aqaý bolsa, ekinshisi árdaiym qoljetimdi bolady. Qazirgi ýaqytta Qostanai oblysynyń Jitiqara qalasynda máseleler bar. Ókinishke orai, tiisti jumystar uiymdastyrylmady», - dedi Didar Smaǵulov Bilim jáne ǵylym ministrliginiń onlain formatta ótken apparat jinalysynda.
Onyń aitýynsha, memlekettik komissiia otyratyn dálizderde 103 arnaiy kamera ornatylǵan. 43 pýnktte 20 maýsymǵa deiin kameralar ornatylady.
«Biraq, Ulttyq biryńǵai test ótkiziletin 15 pýnktte jumys tiisti deńgeide ótedi dep aita almaimyn. 108 pýnktte barlyq material jinalatyn dálizderde kamera bar. 41 pýnktte 20 maýsymǵa deiin uiymdastyrylady. Al 12 pýnktte mundai jumys uiymdastyrylmaǵan», - dedi ortalyq direktory.
Osy oraida QR Bilim jáne ǵylym ministri Ashat Aimaǵambetov UBT ótkizýge daiyndyq jumystarynyń barlyǵy 17 maýsymǵa deiin aiaqtalýy tiistigin atap ótti.
«Erteń barlyq pýnktti qabyldap alamyz. Áli de biz qoiǵan talaptarǵa sai jumys júrgizýge ýaqyt bar. Biyl óte úlken ári qatań talap qoiyp otyrmyz. Sanitaizerler qoiý, maskamen qamtý jumystaryn retteý qajet. Biyl kalkýliatorǵa ruqsat berý sheshimin qabyldadyq. Sondyqtan barlyq máseleni sheship, 17 maýsym kúni meniń deńgeiimde respýblika boiynsha barlyq pýnktterdiń, Bilim basqarmalarynyń basshylarymen jinalys ótkizemiz. Sol jinalysta barlyq máseleni qarastyramyz», - dedi ministr.
