Ulttyq biryńǵai testileýdiń birinshi kúninde test tapsyrý erejesin buzǵan 164 adam joǵary oqý ornyna túsý múmkindiginen aiyryldy. Bul týraly QR BǴM Ulttyq testileý ortalyǵy direktorynyń orynbasary Naýjan Didarbekova aitty, dep habarlaidy QazAqparat.
«21 maýsymda Ulttyq biryńǵai testileý elimizdiń 15 óńirinde bastalyp, 161 pýnkttiń 51-inde ótkizildi. Onyń 44-i aýyldyq jerde ornalasqan. Jalpy, UBT-nyń alǵashqy kúni barlyǵy 6 512 adam testileýge qatysýy kerek edi. Biraq, testileýge 6 186 adam keldi. Iaǵni, 95 paiyzdy qurady», - dedi ol Ortalyq kommýnikatsiialar qyzmetindegi brifing barysynda.
Onyń atap ótýinshe, 2020 jylǵy jańashyldyqtardyń biri ǵimaratqa kirgizý barysynda tyiym salynǵan zattar tabylǵan jaǵdaida testilenýshiniń testileýge jiberilmeýi boldy.
«Osy qaǵidany ustana otyryp, 21 maýsym kúni respýblika boiynsha 73 testilenýshi UBT-ǵa jiberilmedi. Sonymen qatar 91 test tapsyrýshy UBT erejelerin buzǵany úshin aýditoriiadan shyǵaryldy. Tártip buzǵan testilenýshiniń jalpy sany 164 boldy. Olardyń nátijeleri joiylyp, osy jyly testileýge qatysý múmkindiginen aiyrylyp otyr. Al ótken jyly barlyq testileý merziminde 24 tártip buzý bolǵan edi»,- dedi Naýjan Didarbekova.
Ortalyq direktorynyń orynbasary UBT-ny sapaly jáne obektivti ótkizý maqsatynda elimizdiń óńirlerine ministrliktiń 2 500 ókili jiberilgendigin aitady.
«Onyń ishinde 518 arnaiy monitoring tobynyń ókili, sonymen qatar bilim sapasyn qamtamasyz etý departamentiniń jergilikti ókilderi de bar», - dedi ol.
