Tótenshe jaǵdailar ministrligi elimizdegi aýa raiynyń qolaisyzdyǵyna bailanysty vedomstvonyń Ahýaldyq ortalyǵynda Respýblikalyq jedel shtab qurdy, dep habarlaidy "Ult aqparat" TJM baspasóz qyzmetine silteme jasap.
Eske slaa ketsek, «Qazgidromet» elimizdiń 15 óńirinde daýyldy eskertý jariialady (Nur-Sultan q., Shymkent q., Aqmola, Atyraý, Almaty, Shyǵys Qazaqstan,Jambyl, BQO, Qaraǵandy, Qostanai, Pavlodar, Qyzylorda, Mańǵystaý, SQO jáne Túrkistan oblystary).
TJM Ahýaldyq ortalyǵynda Respýblikalyq jedel shtab quryldy. Onyń quramynda «Qazavtojol» UK AQ, «Kazaqavtojol» JShS ókilderi jáne IIM ÁPK qyzmetkeri bar. Aqmola, SQO, Qostanai oblystary jáne Nur-Sultan qalasy TJD-synda osyndai shtabtar jumys jasaidy.
«Qazirgi ýaqytta aýa raiynyń nasharlaýyna bailanysty (boran, qar, shekteýli kóriný, kóktaiǵaq) elimizdiń bes óńirinde - Nur-Sultan qalasy, Almaty, Shyǵys Qazaqstan, Soltústik Qazaqstan, Pavlodar oblystaryndaǵy respýblikalyq joldardyń 8 ýchaskesi men oblystyq joldardyń 40 ýchaskesinde qozǵalys jabyldy.
«Shuǵyl jumystarǵa jalpy TJM, IIM, jol qyzmetteri men jergilikti atqarýshy organdardan 611 adam jáne 321 tehnika jumyldyryldy. Halyqty evakýatsiialaý úshin joldardyń jabyq ýchaskelerinde 284 jylytý pýnkti daiyndaldy, onda 227 adam, onyń ishinde 14 bala ornalastyryldy: SQO (132, onyń ishinde 7 bala), Qostanai oblysynda (64 adam, onyń ishinde 7 bala). TJM aýmaqtyq bólimsheleri Aqmola, Almaty, Atyraý, Qostanai, Pavlodar oblystaryndaǵy avtojoldarda 77 adamdy, onyń ishinde 6 balany evakýatsiialady, 20 adamdy, onyń ishinde 3 balany qutqardy», delingen habarlamada .
Vedomstvonyń málimetinshe, halyqty eskertý maqsatynda aýa raiynyń jaisyzdyǵy týraly 21 SMS habarlama taratylǵan. «Dármen» mobildi qosymshasy arqyly 16 habarlama jiberildi.
Ýaqtyly aqparattyq-psihologiialyq kómek kórsetý úshin Respýblikalyq jedel shtabta jáne óńirlerde (Aqmola, Qostanai oblystary men Nur-Sultan qalasynda) jedel bailanys jelisi ashyldy.
