Stambýl soty AQSh-ta turatyn dini qairatker Fethýlla Gúlendi memlekettik tóńkeris jasamaqshy boldy degen aiyppen qamaýǵa alýǵa resmi túrde order shyǵardy. Pensilvaniia shtatynda turatyn Fethýlla Gúlen Túrkiiada 15 shildede bolǵan búlikke qatysy baryn joqqa shyǵarady. Ol basqaratyn uiym óziniń maqsaty - qaiyrymdylyq kórsetý jáne tolerantty islamdy nasihattaý deidi.
Ankara buǵan deiin AQSh úkimetin Gúlendi qaitarýǵa birneshe ret shaqyrǵan. Túrkiia biligi Vashingtonǵa "Gúlenniń tóńkeriske qatysy baryn kórsetetin" qujattardy joldaǵan. AQSh memlekettik hatshysy Djon Kerridiń sózinshe, Vashington Gúlendi ekstraditsiialaý máselesin qaraýy úshin onyń kináli ekenine bultartpas aiǵaqtar kerek.
