Túrkistan oblysynyń ákimi Ómirzaq Shókeevtiń ókimimen, Qazaqstan Respýblikasy Prezidenti Ákimshiligi jáne Túrkistan qalasynyń máslihat depýtattarynyń kelisimimen Túrkistan qalasy ákimi qyzmetine Nurbol Turashbekov taǵaiyndaldy.
Jańa ákimdi qala aktivine Túrkistan oblysynyń ákimi Ómirzaq Shókeev tanystyryp, aldaǵy maqsat-mindetterin aiqyndap berdi. Túrkistan qalasynyń jańa ákimine úlken jaýapkershilik júktelip otyrǵanyn aityp, abyroily eńbek etetinine senim bildirdi, dep habarlaidy "Ult aqparat" Túrkistan oblysy ákiminiń baspasóz qyzmetine silteme jasap.
«Túrkistan qalasynyń damýynyń birinshi kezeńi aiaqtalyp, ekinshi kezeńi bastaldy. Ózderińizge belgili, jaqynda ǵana óńirdiń keshendi jospary bekitildi. Onda aldaǵy 5 jylda atqarylar jumystar naqtylanǵan. Sonyń aiasynda júieli jumys isteý kerek. Túrkistannyń klimatyn ózgertý jolynda mamandar óte kóp eńbek etýde. Osyny jalǵastyrý kerek. Eki jylda 400 gektar jer saiabaqqa ainaldy. Birneshe sý aidyndary paida boldy. Túrkistan – týǵan qalamyz. Búkil álem kóz tigip otyrǵan túrki áleminiń rýhani astanasy. Osyndai kieli mekendi basqarý buiyrǵan jańa ákimniń aldaǵy jumysyna sáttilik tileimiz» , – dedi oblys ákimi.
Túrkistan qalasyna týra eki jyl ákim bolǵan Rashid Aiýpov osy ýaqyt ishinde ózine qoldaý bildirgen barsha azamattarǵa qala aktivi aldynda alǵysyn aityp, qoshtasty.
Al, Túrkistan qalasynyń jańa ákimi Nurbol Turashbekov ózine bildirgen senim úshin alǵysyn aityp, Túrkistan qalasynyń órkendeýi jolynda bar kúsh-jigerin jumsaitynyn jetkizdi. Berilgen tapsyrmalardy merziminde ári sapaly oryndaýǵa ýáde berdi.
Nurbol Ábdisattaruly Turashbekov 1980 jyly Tólebi aýdanynda týǵan.
2000 jyly M.Áýezov atyndaǵy Ońtústik Qazaqstan memlekettik ýniversitetin, 2005 jyly M.Dýlati atyndaǵy Taraz memlekettik ýniversitetin bitirgen. Mamandyǵy injener-ekonomist.
Eńbek jolyn 2001 jyly Ordabasy aýdanynda jer kadastr biýrosynan bastaǵan.
2002 jyly Ordabasy aýdandyq jer-kadastrlyq biýrosynyń meńgerýshisi, 2009 jyly Sairam jer-kadastrlyq biýrosynyń direktory, 2010 jyly «Ońtústik Qazaqstan jerge ornalastyrý ǵylymi-óńdiristik ortalyǵy» enshiles memlekettik kásipornynyń direktory, 2012 jyly (Astana qalasy) «Jerge ornalastyrý ǵylymi-óńdiristik ortalyǵy» respýblikalyq memlekettik kásiporny bas direktorynyń birinshi orynbasary qyzmetine taǵaiyndalǵan.
2016 jyldyń sáýir aiynan bastap «Azamattarǵa arnalǵan úkimet» memlekettik korporatsiiasynyń «Jer kadastry ǵylymi-óndiristik ortalyǵy» direktsiiasy direktorynyń orynbasary, «Jer kadastry jáne jyljymaityn múlikti tehnikalyq tekserý» direktsiiasy Memlekettik jer kadastry basqarmasynyń basshysy laýazymyn atqarǵan. Birneshe jaýapty qyzmetterde eńbek etken Nurbol Turashbekov 2017-2020 jyldar aralyǵynda Túlkibas aýdanynyń ákimi, 2020 jyldyń mamyr aiynan Ordabasy aýdanynyń ákimi laýazymyn atqaryp keldi.
