Túrkistan oblysynda Shardara sý qoimasynda brakonerlikpen ainalysqan erli-zaiypty jáne jergilikti eki turǵyn 6 jáne 7 jylǵa sottaldy, dep habarlaidy "Ult aqparat".
Ótken jyldyń jazynda jedel-izdestirý is-sharalarynyń nátijesinde oblystyq Politsiia departamentiniń jedel ýákilderi Shardara sý qoimasynda birneshe jyl brakonerlikpen ainalysyp kelgen qylmystyq topty ustaǵan bolatyn. Kúdiktilerden 13 qaiyq pen balyq aýlaý quraldary, eki tonnaǵa jýyq jańa aýlanǵan jáne ystalǵan balyq tárkilendi. Memleketke keltirilgen materialdyq shyǵyn 8 million teńgeden asty.
Bul jaitty politsiia qyzmetkerleri QR QK-niń 335-baby («Balyq resýrstaryn, basqa da sý janýarlaryn nemese ósimdikterin zańsyz alý») jáne QR QK-niń 380-baby («Bilik ókiline qatysty kúsh qoldaný») boiynsha sotqa deiingi tergep-tekserý tizilimine tirkedi.
«Úsh kúdikti er adamdy birden sot qamaýǵa aldy, al qalǵan 7-eýi «eshqaida ketpeý» týraly qolhatpen bosatyldy», - dedi asa mańyzdy ister jónindegi aǵa tergeýshi Altynai Jolymbekova.
Tergeýshige syraptamalardyń tolyq keshenin ótkizýge 3 aidan astam ýaqyt qajet bolǵan. Nátijesinde 10 adamnyń ústinen qozǵalǵan qylmystyq is 23 tomdy, onyń ishinde 4 myń paraqty qurady.
Aiyptaý isi 2020 jyldyń qarasha aiynda sotqa jiberildi. Sot 7 aidan keiin óz sheshimin shyǵardy. Oǵan sáikes, Jetisai aýdanynyń turǵyndary 44 jáne 42 jastaǵy erli-zaiypty men 51 jastaǵy áiel – 6 jylǵa, 32 jastaǵy er adam 7 jylǵa sottaldy.
«Áielderge qatysty bostandyǵynan aiyrý úkimi olardyń kámeletke tolmaǵan balalary 14 jasqa kelgennen keiin kúshine enedi.
Al brakonerlerdiń qylmystyq tobynyń qalǵan músheleri QR QK-niń 65-babyna sáikes keltirilgen zalaldy óteý jáne kináni moiyndaýy, shyn ókinýine bailanysty qylmystyq jaýapkershilikten bosatyldy», - dep atap ótti asa mańyzdy ister jónindegi aǵa tergeýshi, politsiia maiory Altynai Jolymbekova.
