Túrkistanda pandemiia kezinde kontsert uiymdastyrǵandar jaýapqa tartyldy. Bul týraly densaýlyq saqtaý ministrliginiń sanitarlyq-epidemiologiialyq baqylaý komiteti habarlady.
Eske sala ketsek, 24 mamyr kúni Aiqyn, Juldyz Ómirǵali, Qumar Luqpanov pen Táýekel Músilim jáne taǵy basqa otandyq juldyzdardyń qatysýymen tegin kontsert ótken bolatyn.
Jeli qoldanýshylarynyń basym kópshiligi karantin kezeńinde mekteptegi sońǵy qońyraý bolmasa da, kontsert ótkizilip, adamdardyń kóptep jinalǵanyna narazy bolǵan edi.
Al búgin sanitarlyq-epidemiologiialyq baqylaý komiteti kontsert uiymdastyrýshylarynyń jaýapqa tartylǵanyn habarlady.
"Tártip saqshylary is-sharany uiymdastyrǵandardy birneshe kúnnen keiin anyqtady. Politsiianyń baianatynda, 24 mamyrda saǵat 19:00 shamasynda Túrkistan qalasynda jańa kinoteatrdyń ashylýyna bailanysty kontserttik sharanyń ótkeni aitylǵan.
Kinoteatrdyń ashylý saltanatyna orai uiymdastyryǵan kontsertke shamamen 400-450-ge jýyq adam jinalǵan. Karantin rejimin buzǵan azamat ÁQBtK-niń 425 baby boiynsha ákimshilik jaýapkershilikke tartyldy", - deidi sanitarlyq-epidemiologiialyq baqylaý komiteti.
Eske sala ketsek, buǵan deiin Qaraǵandydaǵy saiabaqta karantindik normalardyń óreskel buzylýyna bailanysty birqatar sheneýnik jazalanǵan edi.
Atap aitqanda, Qaraǵandy qalasy ákiminiń eki orynbasary Nurlan Bikenov pen Halel Ákimjanovqa, sondai-aq mádeniet bóliminiń basshysy Baian Nurtaevaǵa sógis jariialanǵan.
Al saiabaq basshysy Mádina Áshirovanyń qyzmetinen bosatyldy.
