Túrkistanda QR Tuńǵysh Prezidenti – Elbasy Nursultan Nazarbaevqa eskertkish qoiyldy, dep habarlaidy "Ult aqparat" oblys ákimdiginiń Facebook paraqshasyna silteme jasap.
Eńseli eskertkishtiń biiktigi – 4 metr, tutastai qoladan quiylǵan músinniń avtory – Qazaqstannyń eńbek sińirgen qaitartkeri, QR Sýretshiler odaǵynyń múshesi Tileýberdi Binash.
Eskertkish QR Tuńǵysh Prezidentiniń egis alqabynda túsken fotosýretine qarap jasalǵan.
Túrkistandaǵy jańa ákimshilik-iskerlik ortalyǵynda ornatylǵan músinniń kompozitsiiasynda «Uly Dalanyń Uly» atty Elbasy eskertkishinde qart Qarataýdyń sulbasy beinelengen. Avtor Elbasynyń Qarataý jazyǵynda sheksiz dalaǵa baiyppen qaraǵan sátin sýrettegen.
Elbasy Nursultan Ábishuly Nazarbaevqa eskertkish qoiý týraly bastamany kásipker Bolatbek Aliev kóterip, atalǵan ideiaǵa túrkistandyq ardager-aqsaqaldar, ziialy qaýym ókilderi, máslihat depýtattary men kásipkerler, qoǵamdyq uiym ókilderi qoldaý bildirgen bolatyn.
Oblys ákimine úndeý jazǵan turǵyndardyń ótinish-tilekteri Ortalyq memlekettik organdar kelisimimen júzege asty.
Budan bólek, Túrkistan qalasynyń ákimdigi tarapynan atalǵan bastamaǵa qatysty jergilikti turǵyndar arasynda saýalnama júrgizildi.
Saýalnamaǵa 1000 respondent qatysyp, olardyń 93% bastamany qoldaityndaryn bildirgen bolsa, respondentterdiń 4,5% qarsy, 2,5% beitarap pozitsiiany ustanǵan.
Demeýshiniń qarjysyna ornatylǵan eńseli eskertkishtiń saltanatty ashylýyna Qazaqstan halyq ártisi, Memleket jáne qoǵam qairatkeri Asanáli Áshimov, «Ardagerler uiymy» respýblikalyq qoǵamdyq birlestiginiń tóraǵasy Ómirzaq Ozǵanbaev, Qazaqstan Ulttyq Ǵylym Akademiiasynyń Prezidenti, akademik, himiia ǵylymdarynyń doktory, professor Murat Jurynov, Qazaqstan Respýblikasy memlekettik Eltańbasynyń avtory Jandarbek Málibekov, Jazýshy, halyqaralyq «Alash» ádebi syilyǵynyń laýreaty Marhabat Baiǵut, Qalamger, halyqaralyq «Alash» ádebi syilyǵynyń laýreaty, qoǵam qairatkeri Kópen Ámirbek, Qazaqstan Respýblikasynyń Parlamenti Májilisiniń depýtaty Darhan Myńbai, Túrkistan oblysy «Ardagerler uiymy» qoǵamdyq birlestiginiń tóraǵasy Jeńisbek Máýlenqulov qatysty.
Sharada sóz alǵan Ardagerler uiymy» respýblikalyq qoǵamdyq birlestiginiń tóraǵasy Ómirzaq Ozǵanbaev osyndai eleýli sáttiń kýási bolǵanyna qýanyshty ekenin jetkizdi.
«Túrkistan óńiriniń halqynyń ótinishimen, kásipkerlerdiń bastamasymen kóne shaharǵa jańa lep ákelgen, túrki integratsiiasynyń iske asyrý ideiasyna muryndyq bolǵan, Túrkistanǵa tarihi mártebesin qaitarǵan Elbasynyń eren eńbegin joǵary baǵalai otyryp, oblys ortalyǵy Túrkistanda Nursultan Ábishuly Nazarbaevtyń eskertkishi ashyldy. Bul – táýelsiz eldiń shekarasyn shegendep, Qazaq elinde tynyshtyq pen berekeni negiz etken Elbasyna alǵys retinde jáne túrki elderiniń basyn qosýǵa múddeli bolǵan túrki áleminiń dana aqsaqalyna degen erekshe qurmet», – dedi qoǵam qairatkeri.
