Túrkistan oblysynyń ákimi Ómirzaq Shókeevtiń tóraǵalyǵymen ótken apparat otyrysynda Tólebi aýdanynyń Sairam-Ógem memlekettik ulttyq tabiǵi parkiniń aýmaǵynda 7 adamnyń joǵalýyna bailanysty sońǵy málimetter baiandaldy, dep habarlaidy "Ult aqparat".
Óńirlik Tótenshe jaǵdailar departamentiniń basshysy Nurǵali Júnisovtiń málimdeýinshe, taýda joǵalyp ketken týrister tobyn izdestirý jumystary kúndiz-túni júrip jatyr. Oǵan qutqarýshylar, politsiia qyzmetkerleri, shekara qyzmetiniń at patrýli, ulttyq park qyzmetkerleri, alpinister, jalpy 100-den astam adam qatysýda.
«Sondai-aq 2 tikushaq, 4 pilotsyz áýe quraldary, 15 tehnika, qutqarýshylardyń 2 kinologiialyq qyzmeti, psihologtar, jedel-járdem qyzmeti jumyldyrylǵan. Almaty qalasynan kómekke kelgen azamattar pilotsyz ushý quraldarynyń kómegin usynyp, túngi ýaqyta izdestirý jumystary júrgizildi. 30 mamyr kúni Qazaqstan jáne Ózbekstan Tótenshe jaǵdailar ministrlikteriniń ekijaqty kelisimi boiynsha Óbekstan Respýblikasynyń qutqarýshylary óz aýmaqtarynda Ógem ózeni boiynda izdestirý jumystaryn bastady», - dedi TJD bastyǵy.
Oblys ákimi Ómirzaq Shókeev mundai jaǵdailardyń aldyn alý jáne aldaǵy ýaqytta boldyrmaý maqsatynda jaýapty basshylarǵa tiisti tapsyrmalar berdi. Taýly aimaqtarda qaýipsizdikti qamtamasyz etý sharalaryn kúsheitýdi júktedi.
