Túrkistan oblysynda joǵalyp ketken týristerdi izdeýge tikushaq jumyldyryldy. Bul jaiynda Túrkistan oblystyq tótenshe jaǵdailar departamenti bastyǵynyń orynbasary, podpolkovnik Erik Sarybaev málim etti, dep habarlaidy "Ult aqparat".
«Qazirgi ýaqytta Túrkistan oblysynyń Tóle bi aýdanydaǵy Sairam-Ógem memlekettik ulttyq tabiǵi parkinde izdeý jumystary júrgizilip jatyr. 21 mamyr kúni saǵat 08-00 shamasynda quramynda 7 adam bar bir top taýǵa týristik joryqqa shyqqan. Olardyń 5 asýǵa barmaq bolǵany týraly aqparat bar. Úsh kúnnen beri júrgizilip jatqan izdeý jumystary nátije bermei otyr», - dedi ol.
Onyń atap ótýinshe, izdestirý jumysyna tótenshe jaǵdailar departamentiniń mamandary, jergilikti atqarýshy organdardyń, ulttyq parktiń jáne shekara qyzmetiniń qyzmetkerleri, jalpy 50 adam jumyldyrylǵan. Keshe olar taý asýlarynda 37 shaqyrymnan astam jerdi jaiaý júrý arqyly sholyp shyqty. Sonymen qatar kvadrokopterlerdiń kómegimen radiýsy 4 shaqyrymnan asatyn aýmaq zertteldi.
«Osy ýaqytqa deiin tabiǵattyń qolaisyz bolýyna, iaǵni, taýly aýdandarda qar, jańbyr jaýýyna bailanysty tikushaq arqyly izdeý múmkin bolmady. Qazirgi ýaqytta Shymkent qalasynyń áýejaiynda turǵan Evrokopter tikushaǵy áýege kóterilip, izdeý jumystary júrgizýde. Qosymsha taǵy tikushaqtardy jumyldyrý máselesi sheshilip jatyr», - dedi Erik Sarybaev.
