Túrkistan oblysynda joǵalǵan týristerdiń biriniń máiiti Sairam-Ógem shatqalynan tabyldy, dep habarlaidy "Ult aqparat".
«2021 jyldyń 12 maýsymynda Ógem ózeni kópiriniń sol jaǵynan Azarteke jotasyna deiingi baǵytty tekserý barysynda Respýblikalyq jedel-qutqarý jasaǵynyń qutqarýshylary (RJQJ) Túrkistan oblysynyń Maqpalsai shatqalynan bir adamnyń máiitin tapty. Shatqal teńiz deńgeiinen 1000 metr biiktikte ornalasqan», - dedi QR Tótenshe jaǵdailar ministrliginiń resmi ókili Talǵat Ýáli.
Resmi ókildiń aitýynsha, taýly releftiń, jartasty betkeilerdiń kóptiginen máiitti tikushaqpen tasymaldaý múmkin bolmaǵan. RJQJ qutqarýshylary Ógem ózenindegi ótkeldi (aǵys jyldamdyǵy sekýndyna 20 metr) jaiaý júrip, máiitke qarai barǵan.
«RJQJ qyzmetkerleri máiitti áýe kemesine deiin jaiaý kóterip aparyp, tikushaq áýede «qalqyp» turyp júk kótergish shyǵyrdyń kómegimen ony kóterip aldy.
Tabylǵan múrde saraptama júrgizý úshin politsiia qyzmetkerlerine tapsyryldy. Izdeý jumystaryna Túrkistan oblystyq Tótenshe jaǵdailar jáne Politsiia departamentteriniń, UQK Shekara qyzmetiniń, orman sharýashylyǵynyń, Ózbekstan Respýblikasy TJM 127 qyzmetkeri, 15 tehnika, 3 kvadrokopter, 3 kinologiialyq top, 1 tikushaq jáne joǵalǵan týristerdiń týystary jumyldyryldy. Izdeý jumystary segiz baǵyt boiynsha júrgizilýde», - deidi T. Ýáli.
QR TJM keiinnen habarlaǵandai, tabylǵan 6-ynshy týrist - 17 jastaǵy jigit. Múrdesin ákesi tanyǵan.
Eske salasaq, 21 mamyr kúni Túrkistan oblysynyń «Sary-Aiǵyr» shatqalyna jaiaý bet alǵan 7 týrist joǵalyp ketti. 24 mamyrda olar keri qaitýy kerek bolatyn. 25 mamyrda jastardyń joǵalǵany týraly «112» pýltine habar berilgen.
28 mamyrda 7 adamnyń 3-eýi tabylyp, qutqaryldy. Al 29 mamyr kúni eki týristiń denesi tabyldy.
Búgin QR TJM resmi ókili Talǵat Ýáli qalǵan eki adamdy izdeý jumystary jalǵasyp jatqanyn málim etken bolatyn.
