Túrkistan oblysynda taýǵa shyǵyp, iz-túzsiz joǵalyp ketken jeti týristiń úsheýi Ógem taý shatqalynan tabyldy. Úsheýi de dereý Shymkent áýejaiyna jetkizilip, Sairam Ógem ulttyq parkiniń shtabynda ata-analarymen qaýyshty, dep habarlaidy "Ult aqparat".
Óńirlik TJD bastyǵynyń orynbasary Erik Sarybaevtyń aitýynsha, stýdentterdi qutqarý operatsiiasy áýeden júrgizilgen. Úsheýi de din aman, meditsinalyq kómekti qajet etpegen. Al, týristerdiń adasyp ketýine aýa-raiynyń kúrt sýytýy sebep bolǵan. Qalyń tuman men qardyń qalyń jaýǵany jáne jol kórsetýshiniń bolmaýy túrli qiyndyqtar týǵyzǵan.
«Shyńǵa jetken kezde, eki kúnnen keiin jolda adasyp kettik. Keiin jeti adamnyń ishinde bir kisi aýyryp qaldy. Soǵan bailanysty úsheýi bir orynda qaldy da, tórteýi ary qarai ketti. Úsheýmiz úsh kún túnedik sol jerde, búgin shyǵyp kele jatqan kezde bizdi taýyp aldy TJQ qyzmetkerleri»,- deidi adasqan stýdentter.
Tórt kúnnen beri izdeý sharalaryn júrgizgen óńirdiń tótenshe jaǵdailar qyzmetiniń basshylyǵy týristerdiń as-aýqaty bitip qalǵanyn aitady. Degenmen eshbiri jatyp qalmastan, qozǵalystaryn toqtatpaǵan. Taýdan tabylǵandar Aqtóbe oblysy men Oral, Jezqazǵan qalalarynyń týmalary. Qazirgi tańda qalǵan tórt týristi tikushaqpen izdeý jumystary jalǵasýda.
