Foto: ashyq derekkóz
Qarjylyq monitoring agenttigi Túrkistan oblysy boiynsha departamenti júrgizgen tergeý nátijesinde Baidibek aýdandyq bilim bóliminiń laýazymdy tulǵalaryna qatysty biýdjet qarajatyn júieli túrde jymqyrý isi boiynsha sot úkimi shyqty, dep habarlaidy Ult.kz.
Tergeý málimetinshe, basshylar, býhgalterler jáne ekonomisterdi qosa alǵanda 18 adam jalaqy men ózge de tólemderge arnalǵan biýdjettik ótinimderdi negizsiz ulǵaitý arqyly aýdannyń 49 jalpy bilim beretin mektebiniń qarjysyn iemdený shemasyn uiymdastyrǵan.
Býhgalteriia qyzmetkerleri elektrondyq júielerge ádeii jalǵan málimetter engizip otyrǵan. Tólem qujattaryna is júzinde jumys istemegen adamdar tirkelgen nemese qyzmetkerlerdiń jalaqysy men ústemeaqylary negizsiz kóbeitilgen.
Zańsyz áreketterdi jasyrý úshin qyzmettik jazbalar, buiryqtar, esep vedomostary jáne jumys ýaqyty tabelderi sekildi jalǵan qujattar paidalanylǵan. Keibir qujattar tólem jasalǵannan keiin keri kúnmen rásimdelip, eseptilik sáikestendirilgen.
Qarajat jalǵan tulǵalardyń, onyń ishinde týystary men tanystarynyń banktik shottaryna aýdarylyp, keiin aldyn ala kelisilgen úles boiynsha qatysýshylar arasynda bólingen.
Nátijesinde memleketke keltirilgen zalal kólemi 583 mln teńgeden asqan. Tergeý barysynda kúdiktiler shyǵyndy tolyq ótegen.
Sot úkimimen 14 adam 3 jyldan 7 jylǵa deiin bas bostandyǵynan aiyryldy. Taǵy 4 adamǵa qatysty is raqymshylyqqa bailanysty toqtatyldy.
Úkim zańdy kúshine endi.
