Foto: ashyq derekkóz
Túrkistan oblysynda agroónerkásip salasyndaǵy sýbsidiiany zańsyz alǵan kooperativ tóraiymy sot úkimimen kináli dep tanyldy, dep habarlaidy Ult.kz prokýratýra málimetine silteme jasap.
Arys aýdanynyń prokýratýrasy júrgizgen tekseris barysynda biýdjet qarajatyn asa iri mólsherde jymqyrý faktisi anyqtalǵan. Tergeý derekterine sáikes, «Y» aýyl sharýashylyǵy óndiristik kooperativiniń tóraiymy 2021 jyldyń sáýir aiynda aqparattyq júiege jalǵan málimet engizýdi uiymdastyrǵan.
Atap aitqanda, kooperativ atynan 2470 bas analyq iri qara maldy jáne selektsiialyq jumystar júrgizý úshin 120 bas asyl tuqymdy buqany jalǵa alǵany týraly jalǵan aqparat kórsetilgen. Osy derekter negizinde memleketten kooperativtiń banktik shotyna 24,7 mln teńge kóleminde sýbsidiia aýdarylǵan.
Alaida tekseris barysynda shyn máninde selektsiialyq jumystar nebári 18 bas asyl tuqymdy buqa men 450 bas analyq iri qaraǵa ǵana júrgizilgeni anyqtalǵan. Nátijesinde zańsyz alynǵan sýbsidiia kólemi 20,2 mln teńgeni quraǵan.
Atalǵan fakti boiynsha prokýratýra Qazaqstan Respýblikasy Qylmystyq kodeksiniń 190-baby 4-bóligi 2) tarmaǵy (asa iri mólsherde alaiaqtyq) boiynsha sotqa deiingi tergep-tekserýdi bastaǵan.
Sottyń 2026 jylǵy 20 aqpandaǵy úkimimen kooperativ tóraiymy kináli dep tanylyp, 4 jylǵa bas bostandyǵynan aiyryldy. Sonymen qatar oǵan 5 jyl merzimge kommertsiialyq uiymdarda basshylyq qyzmet atqarýǵa tyiym salyndy.
Prokýratýranyń málimetinshe, zańsyz alynǵan qarajat tolyq kólemde óndirilip, memleket kirisine qaitarylǵan.
