2025 jylǵa deiin Túrkistan oblysynda 570 tósektik kóp beiindi aýrýhana, 500 oryndyq úsh emhana, jedel meditsinalyq járdem stantsiiasy, Ana men bala ortalyǵy salynady, dep habarlaidy "Ult aqparat".
Bul týraly Ulttyq ekonomika ministri Áset Erǵaliev Úkimet otyrysynda málim etti.
«Densaýlyq saqtaý salasynda 570 tósektik kóp beiindi aýrýhana, aýysymda 500 adam qabyldaityn úsh emhana, jedel meditsinalyq járdem stantsiiasy, sondai-aq Ana men bala ortalyǵy salynady. 3 aýysymdy jáne apatty mektepterdi joiý, sondai-aq oqýshy oryndarynyń tapshylyǵyn azaitý maqsatynda 130 jańa mektep salynady», - dedi Ulttyq eonomika ministri.
Sonymen qatar, Nazarbaev ziiatkerlik mektebi men jataqhanasy bar «Daryn» mektep-internatynyń qurylysy josparlanyp otyr. Áset Erǵaliev Kúltóbe qalashyǵynyń kesenelerin, tarihi nysandaryn qalpyna keltirý, Túrkistan qalasyndaǵy «Áziret Sultan» mýzei-qoryǵynyń aýmaǵyn abattandyrý jalǵasatynyn aitty.
«Al dene shynyqtyrýmen jáne sportpen shuǵyldanatyn azamattardy qamtýdy 45%-ǵa deiin ulǵaitý boiynsha jumys júrgiziledi. Ol úshin tennis ortalyǵy, muz saraiy, at-sport kesheni jáne basqa da obektiler salynady», - dedi ministr.
