Túrkistan qalasynda simýliatsiia ortalyǵy salynady. Bul týraly Úkimet otyrysynda QR Densaýlyq saqtaý ministri Aleksei Tsoi aitty, dep habarlaidy QazAqparat.
«Bul ortalyqta dárigerler biliktilik kóterýden ótip, naqty klinikalyq jaǵdailarda is-júzinde daǵdy jinaidy. Joǵary meditsinalyq tehnologiialarǵa oqytý túrli modelderde, trenajerler men virtýaldy simýliatorlarda júrgizý josparlanǵan. Bul meditsina qyzmetkerleriniń kásibi qyzmet barysynda protsesterdi, jaǵdailardy jáne ózge de aspektilerdi naqty modeldeýge múmkindik beredi», - dedi ministr.
Onyń atap ótýinshe, Túrkistan qalasynda halyqqa ambýlatorlyq stomatologiialyq kómek kórsetetin emhana joq. Sondyqtan bir aýysymda 300 kelýshini qabyldaityn tis emhanasyn salý josparlanǵan. Búginde jobalyq-smetalyq qujattary ázirlenip jatyr.
«Túrkistan qalasynda 25 brigadaǵa arnalǵan jedel meditsinalyq kómek stansasy salynady. Búginde qurylysy júrgizilip jatyr. Túrkistan oblysy ákimdiginiń aqparatyna sáikes H.H.Sheikh Mohamed Bin Zayed Al Nahyan qory Ana men bala ortalyǵyn salýdy josparlap otyr», - dedi Aleksei Tsoi.
