Biryńǵai jinaqtaýshy zeinetaqy qory salymshylarǵa jeke zeinetaqy shotynyń jai-kúiin baqylap otyrý kerektigin eske saldy, dep habarlaidy "Ult aqparat".
Jeke zeinetaqy shotynyń jai-kúii týraly aqparatty BJZQ keńselerine tikelei kelip, sondai-aq, dástúrli poshta arqyly úzindi kóshirme alý jáne elektrondyq tásilderdi paidalana otyryp bilýge bolady.
Qazirgi kezde jeke zeinetaqy shot týraly aqparat alýdyń eń tanymal tásili – internet bailanysy. Ony 6,6 mln-nan astam JZSh ieleri tańdady.
Bul rette salymshylar men alýshylar 5 762 454 shot týraly enpf.kz saityndaǵy jeke kabinet nemese ENPF uialy qosymshasy arqyly qalaǵan ýaqytynda, álemniń kez kelgen túkpirinen bile alady.
Osyndai habarlaý tásilin tańdaǵandar sany bir jylda 225 125 adamǵa artty.
BJZQ-ǵa berilgen elektrondyq poshta mekenjaiyna jiberiletin úzindi kóshirmeni 853 954 adam alady. Ol shot iesine ózi tańdaǵan keste boiynsha ai saiyn, toqsan saiyn, jarty jylda bir ret nemese jyl saiyn kelip turady.
Jeke zeitenqy týraly kóshirmeni dástúrli poshta arqyly alý tásilin áli kúnge deiin 1 297 726 adam qoldanady.
BJZQ jeke zeinetaqy shotyn kez kelgen yńǵaily tásilmen únemi qadaǵalap otyrý qajettigin eskertedi.
Ol shotyńyzdyń únemi tolyǵyp otyratynyna kózińizdi jetkizip, bolashaq zeinetaqyńyzdy josparlaýda senimdi bolýǵa múmkindik beredi.
