Turǵyn úi keshenderin internetsiz paidalýǵa berýge tyiym salynady. Bul týraly Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin málim etti, dep habarlaidy QazAqparat.
«Kórsetilgen problemalardy eskere otyryp, retteýshiniń rólin, iaǵni bizdiń ministrlikti kúsheitýdi usynyp, tiisti zańnamalarǵa ózgertýlerdi engizbekpiz. Birinshiden, sapaly sheshim ári baqylaý mindetterin atqarý úshin telekommýnikatsiia jelileriniń bas shemasyn ázirleimiz. Bul aqparatty ministrlikke operatorlar avtomatty túrde berýi qajet», - dedi ministr tsifrlandyrý taqyryby boiynsha Senatta ótip jatqan Úkimet saǵatynda.
Ekinshiden, vedomstvo internet sapasyna qoiylatyn talaptardy belgileidi jáne kórsetilgen qyzmetterdiń sapasyna baqylaýdy kúsheitpek.
«Sonymen qatar, radiojiilikterdi bólýdiń jańa standarttaryn bekitý kerek. Turǵyn úi keshenderin internetsiz paidalýǵa berýge tyiym salatyn bolamyz. Uialy bailanys uiymdaryna bólingen radiojiilikter úshin tólemaqynyń jyldyq mólsherlemesin 90 paiyzǵa qysqartý arqyly aýyldyq eldi mekenderde keń jolaqty utqyr bailanys jelilerin salýǵa arnalǵan qarajatty qaita investitsiialaý maqsatynda salyqtyq preferentsiialar berýdi usynýdamyz», - dedi B. Mýsin.
Ministrdiń sózine qaraǵanda, salalyq zańnama talaptaryn buzǵany úshin aiyppuldar somasyn ulǵaitý eskerilip otyr.
