Mańǵystaý oblysynyń ákimi Serikbai Trumov óńirdegi qýańshylyqqa bailanysty mal basyn saqtap qalý maqsatynda jasalyp jatqan jumystar jaiynda baiandady. QR Prezidenti janyndaǵy Ortalyq kommýnikatsiialar qyzmetinde ótken baspasóz konferentsiiasynda oblys basshysy mal azyǵy qoryn molaitý úshin jergilikti biýdjetten 200 mln teńgeden astam qarajat bólingenin aitty.
«Biyl qysta qardyń, kóktemde jaýyn-shashynnyń túspeýi – mal ósirip otyrǵan sharýalarǵa qiyndyq týdyryp otyr. Osyǵan orai arnaiy jumys toby quryldy. Ólkeniń jeke sharýashylyqtaryn mal azyǵymen qamtamasyz etý úshin jaqyn ornalasqan Aqtóbe oblysymen kelissózder júrgizildi. Onyń ishinde mal azyǵyn qajetti mólsherde jetkizýge jáne Mańǵystaý oblysynyń sharýashylyqtaryna jaiylymdyqqa, shabyndyqqa jer ýchaskelerin berýge kelisildi. Búgingi kúni bul jumystardy bastap kettik. Jergilikti biýdjetten mal azyǵy qoryn qalyptastyrý maqsatynda 200 mln teńgeden astam qarajat bólindi. Kórshi oblystardan tielgen jem-shóp óńir sharýalaryna jetkizilýde», - dedi S. Trumov.
Sonymen qatar, oryn alǵan jaǵdaiǵa bailanysty quramynda Aýyl sharýashylyǵy, Ekologiia ministrligi ókilderi, Májilis depýtattary respýblikalyq «Qazgidromed» basshysy, jergilikti atqarýshy organdardyń qyzmetkerlerinen turatyn arnaiy jumys toby qurylyp oblystyń qazirgi jaǵdaimen tanysty, jergilikti halyqpen kezdesti. Nátijesinde memlekettik qoldaýlarǵa ózgerister engizý, Úkimet tarapynan qoldaý kórsetý qajettigi boiynsha usynys berilip jumys jalǵasýda. Osy jumystar aiasynda «Azyq túlik kelisim-shart korporatsiiasy» AQ arqyly 1700 tonna arzan baǵada arpa aldyrý josparlanyp otyr.
«Qazgidromet» RMK málimetinshe, Mańǵystaýda jaýyn-shashynnyń mólsheri qajetti normanyń 17% qurap otyr.
