Foto: RIA Novosti
AQSh prezidenti Donald Tramp Vashingtonnyń Iranǵa qarsy áskeri operatsiiasy aldaǵy tórt apta boiy jalǵasýy yqtimal ekenin málimdedi. Aq úi basshysy bul týraly Daily Mail basylymyna bergen suhbatynda aitqan, dep habarlaidy Ult.kz.
Tramptyń sózinshe, operatsiia «josparǵa sai» júrip jatyr. Ol AQSh soqqylary nátijesinde Iran basshylyǵynyń 48 ókili joiylǵanyn alǵa tartty. Sonymen qatar amerikalyq lider Iranmen kelissóz júrgizýge daiyn ekenin bildirdi, alaida onyń qashan ótetinine naqty jaýap bere almady.
«Olar kelissóz ótkizgisi keledi. Biraq men olarǵa: “Ótken aptada sóilesý kerek edi, qazir emes” dedim», – dedi Tramp.
Eki táýlikte ekinshi ret halyqqa úndeý jasady
1 naýryz kúni Aq úi basshysy amerikalyqtarǵa arnap taǵy bir málimdeme jasap, qaza tapqan úsh áskeri qyzmetker úshin «kek qaitarýǵa» ýáde berdi. Ol Tegeranǵa jańa ýltimatým qoiyp, AQSh azamattaryn óziniń «erkindik jolyndaǵy kúresin» qoldaýǵa shaqyrdy. Bul – sońǵy 48 saǵat ishindegi ekinshi úndeý.
Buǵan deiin The Atlantic basylymyna bergen suhbatynda Tramp Iran biligin «tym uzaq kútti» dep aiyptaǵan. Onyń aitýynsha, sońǵy aptalarda Vashington bailanysqa shyqqan irandyq kelissóz júrgizýshilerdiń keibiri áýe soqqylary saldarynan qaza tapqan.
Izrail men AQSh-tyń Iranǵa qarsy operatsiiasy
28 aqpan kúni tańerteń Izrail men AQSh Tegeranǵa jáne Iran aýmaǵyndaǵy ózge nysandarǵa soqqy jasady. Tramp Islam Respýblikasynyń iadrolyq baǵdarlamasyn joiý nietin málimdep, Iran áskerin qarýyn tastaýǵa, al halyqty «taǵdyryn óz qolyna alýǵa» shaqyrdy.
Óz kezeginde Iran Izrail aýmaǵyna jáne Taiaý Shyǵystaǵy birqatar nysandarǵa soqqy jasady. AQSh Qarýly kúshteriniń Ortalyq qolbasshylyǵy bastapqyda amerikalyq nysandarǵa keltirilgen zalal «mardymsyz» ekenin habarlaǵan. Alaida 1 naýryzda irandyq soqqylar saldarynan úsh amerikalyq áskeri qyzmetkerdiń qaza taýyp, beseýiniń aýyr jaralanǵany málim boldy.
Iran tarapy áskeri operatsiianyń ekinshi kúni eldiń joǵarǵy jetekshisi aiatolla Ali Hamenei men birqatar joǵary laýazymdy kúshtik qurylym ókilderiniń, sonyń ishinde qorǵanys ministri Aziz Nasirzade men Islam revoliýtsiiasy saqshylar korpýsynyń qolbasshysy Mohammad Pakpýrdyń qaza tapqanyn rastady.
