2021 jyly Japoniiada ótetin Tokio Olimpiada oiyndarynda Qazaqstan namysyn 110-nan astam sportshy qorǵaidy dep kútilýde. Bul týraly Ortalyq kommýnikatsiialar qyzmeti alańynda ótken brifingide QR Mádeniet jáne sport vitse-ministri Sáken Musaibekov aitty, dep habarlaidy "Ult aqparat".
«Qazirgi ýaqytta bizdiń komandamyzdyń qorjynynda Tokio oiyndarynyń 42 litsenziiasy bar. Ózderińiz bilesizder, Olimpiada oiyndary 2021 jylǵa aýystyryldy jáne 23 shilde men 5 tamyz aralyǵynda ótedi. Elimizdiń tarihynda alǵash ret júzýden Dmitrii Balandin syndy Olimpiada chempiony shyqty ári ol litsenziia alyp úlgerdi. Sońǵy 20 jylda alǵash ret sadaq atýdan komandalyq saiysqa qatysamyz. Sporttyń komandalyq túrinen vaterpolshylarymyz da litsenziia aldy», - dedi ol.
Vitse-ministrdiń atap ótýinshe, qazirgi ýaqytta Olimpiadaǵa barýǵa úmittenetin sportshylarymyzdyń barlyǵy qyzý daiyndyqqa kirisip ketken. Olarǵa 1 maýsymnan bastap qaýipsizdiktiń barlyq sharalaryn saqtai otyryp, jattyǵýǵa ruqsat berilgen.
«Josparlaǵanymyzdai 100-den astam litsenziia utyp alamyz. Olimpiada oiyndaryna 110-nan astam sportshymyz qatysady. Biz qyz-jigitterimizdiń, komandamyzdyń tabysty óner kórsetetinine senimdimiz», - dedi Sáken Musaibekov.
