Prezident Qasym-Jomart Toqaev Japoniia Premer-ministri Fýmio Kishidaǵa kóńil aitý jedelhatyn joldady, dep habarlaidy "Ult aqparat" Aqordanyń resmi saityna silteme jasap.
Memleket basshysy Japoniianyń burynǵy Premer-ministri Sindzo Abeniń qastandyq áreket saldarynan qaza bolǵany týraly sýyt habardy tereń kúizelispen qabyldady.
«Álem jurtshylyǵy Sindzo Abeni eliniń damýy men baiandy bolashaǵy úshin uzaq jyldar boiy qajyrly qyzmet etken kórnekti saiasatker, halyqaralyq turaqtylyq pen qaýipsizdikti nyǵaitýǵa súbeli úles qosqan parasatty kóshbasshy dep biledi. Sindzo Abeniń jarqyn beinesi Qazaqstan halqynyń jadynda qazaq-japon arasyndaǵy dostyq pen senimdi bekemdei túsken tulǵa, san qyrly yntymaqtastyqty nyǵaitýǵa zor eńbek sińirgen memleket qairatkeri retinde máńgi saqtalady. Qazaqstan halqynyń jáne jeke óz atymnan marqumnyń otbasy men týǵan-týystaryna, sondai-aq barsha otandastaryńyzǵa qaiǵyra kóńil aitamyn», – delingen jedelhatta.
