Memleket basshysy Qasym-Jomart Toqaev Dáýlet Sembaevtyń jaqyndary men týystaryna kóńil aitty. Bul týraly QR Prezidentiniń baspasóz hatshysy Berik Ýáli jelidegi paraqshasynda jazdy.
Prezident kórnekti memleket qairatkeri, belgili qarjyger Dáýlet Sembaevtyń qaitys bolýyna bailanysty kóńil aitý jedelhatyn joldady.
«Dáýlet Hamituly zaýyt sheberinen Premer-Ministrdiń Birinshi orynbasary, Qazaqstan Respýblikasynyń Ulttyq bank tóraǵasy qyzmetine deiingi úlken ómirlik ári kásibi joldan ótti. Onyń elimizdegi qarjy sektoryn qalyptastyrýǵa jáne damytýǵa, ulttyq valiýtany engizýge, Táýelsiz Qazaqstannyń zeinetaqy reformasyn júrgizýge sińirgen eńbegi zor. Ol jańa ekonomikalyq saiasattyń jolǵa qoiylýyna ólsheýsiz úles qosty. Parlament Senatynyń depýtaty, Qarjygerler assotsiatsiiasy keńesiniń tóraǵasy retinde qarjylyq-ekonomikalyq zańnamany jetildirý úshin aýqymdy ári tiimdi jumys istedi», – delingen jedelhatta.
Qasym-Jomart Toqaev Dáýlet Sembaevtyń zor bedel men qurmetke ie bolǵanyn jáne jas qarjygerler býyny ony úlgi tutqanyn atap ótken.
