Foto: Aqorda
Qasym-Jomart Toqaev Janat Elimanov qabyldap, vedomstvonyń qyzmet qorytyndylary men aldaǵy mindetteri týraly esep tyńdady, dep habarlaidy Ult.kz.
Kezdesý barysynda agenttik tóraǵasy biýdjet qarajatyn igerý barysyna júrgizilgen monitoring nátijelerin baiandady. Onyń aitýynsha, mal sharýashylyǵy salasyna bólingen 30 milliard teńge sýbsidiiany tiimsiz paidalaný táýekelderi anyqtalǵan. Sonymen qatar ǵylymi zertteýler men ǵylymi-tehnikalyq nátijelerdi kommertsiialandyrýǵa baǵyttalǵan 10 milliard teńgeden astam qarajattyń maqsatsyz jumsalý belgileri belgili bolǵan.
Mindetti áleýmettik meditsinalyq saqtandyrý qarajatyn jymqyrý faktileri boiynsha 14 sotqa deiingi tergeý bastalǵan. Al qurylys salasynda 5,3 milliard teńgeni zańsyz iemdenýge bailanysty 21 qylmystyq is qozǵaldy.
Alaiaqtyqtyń aldyn alý baǵytynda 17 qarjy piramidasynyń qyzmeti toqtatylǵan. Sondai-aq bankter men bailanys operatorlarynyń atyn jamylyp, fishingtik SMS-habarlamalar taratqan qylmystyq top áshkerelengen.
Jalpy aýditoriiasy 25 myńnan asatyn 3,7 myń alaiaqtyq sait pen 22 toptyq chat jabylǵan. Budan bólek, 400-den astam jalǵan qurylys kompaniiasynyń zańsyz litsenziia alý áreketine tosqaýyl qoiyldy.
Qylmystyq tabystardy jylystatýǵa qarsy kúres aiasynda da birqatar nátijeler bar. Atap aitqanda, drop-kartalardy paidalanýǵa qatysty 14 tergeý bastalyp, olardyń esepshottaryndaǵy qarjy ainalymy 13 milliard teńgeden asqany anyqtalǵan. «Kóleńkedegi» tulǵalarǵa rásimdelgen 68 myńnan astam bank kartasy buǵattaldy.
Sondai-aq jalǵan kompaniialar men qujattardy paidalaný derekteri boiynsha 23 is tirkelip, keltirilgen zalal shamamen 13 milliard teńgeni qurady. Qarjy piramidalary, onlain-kazino jáne alaiaqtyqtan túsken tabysty zańdastyrýmen ainalysqan 3 jasyryn kriptoaiyrbastaý qyzmetiniń joly kesildi. Zańsyz kriptovaliýta servisterine aparatyn 483 silteme joiyldy.
Kezdesý qorytyndysynda Memleket basshysy agenttiktiń negizgi baǵyttary boiynsha birqatar naqty tapsyrma berdi.
