Foto: Aqorda
Qasym-Jomart Toqaev Beibitshilik keńesiniń alǵashqy otyrysynda sóz sóilep, Qazaqstan Gaza sektoryndaǵy ahýaldy turaqtandyrýǵa, onyń ishinde meditsina mamandary men áskeri baqylaýshylar jiberýge daiyn ekenin málimdedi, dep habarlaidy Ult.kz.
Memleket basshysy sammitke qatysýshylarǵa iltipat bildirip, jiyndy uiymdastyrǵany úshin Donald Tramp-qa alǵys aitty. Onyń aitýynsha, Donald Tramp atyndaǵy Beibitshilik institýtynda ótken kezdesý jai ǵana qarar qabyldaityn alań emes, naqty ári pragmatikalyq qadamdarǵa negizdelgen is-shara.
– Bul – batyl áreketter sheshýshi ról atqaratyn kezeń. Sizdiń jahandaǵy beibitshilik pen turaqtylyqty ilgeriletýge baǵyttalǵan aiqyn ustanymyńyz elimizdiń Beibitshilik keńesine qosylýyna túrtki boldy, – dedi Prezident.
Qasym-Jomart Toqaev Beibitshilik keńesin kópjaqty kúsh-jigerdi biriktiretin, zaman talabyna sai uiym retinde baǵalady. Onyń pikirinshe, «Jasampazdyq arqyly beibitshilik» tujyrymdamasyn júzege asyrýǵa naqty múmkindik bar.
Prezident Qazaqstannyń Gaza sektoryn qalpyna keltirý jumystaryna halyqaralyq bedeli joǵary kompaniialardy tarta otyryp qatysýǵa nietti ekenin jetkizdi. El infraqurylymdy qaita qurýǵa, turǵyn úiler, mektepter, aýrýhanalar jáne ózge de áleýmettik nysandar salýǵa atsalysýǵa daiyn.
Sonymen qatar Qazaqstan azyq-túlik qaýipsizdigin qamtamasyz etý úshin gýmanitarlyq kómek kórsetýge ázir. Memleket basshysy palestinalyq stýdentterge qazaqstandyq joǵary oqý oryndarynda bilim alý úshin bes jyl ishinde 500-den astam grant bólý josparlanyp otyrǵanyn aitty.
– Qazaqstan Halyqaralyq turaqtandyrý kúshterin qoldaýǵa ázir. Dalalyq gospital qurý úshin bir top meditsina mamanyn, sondai-aq Azamattyq-áskeri úilestirý ortalyǵyna baqylaýshylar jiberýge daiarmyz, – dedi Qasym-Jomart Toqaev.
Prezidenttiń aitýynsha, elimiz elektrondyq úkimet salasyndaǵy tájiribesimen jáne tsifrlyq sheshimderimen de bólise alady.
Memleket basshysy Qazaqstannyń beibitshilik pen turaqtylyqty qamtamasyz etý jolyndaǵy halyqaralyq bastamalarǵa belsendi túrde qatysa beretinin atap ótti.
