Foto: Aqorda
Memleket basshysy Qasym-Jomart Toqaev Densaýlyq saqtaý ministri Aqmaral Álnazarovany qabyldady, dep habarlaidy Ult.kz.
Kezdesý barysynda ministr Prezidentke densaýlyq saqtaý júiesiniń qazirgi jaǵdaiy men salany damytý perspektivalary týraly esep berdi.
Aqmaral Álnazarovanyń aitýynsha, eldegi negizgi meditsinalyq-demografiialyq kórsetkishter jaqsarǵan. Atap aitqanda, jalpy jáne náresteler ólimi 15,3 paiyzǵa tómendegen. Sonymen qatar Qazaqstanda juqpaly emes aýrýlardan merziminen buryn qaitys bolǵandar sany 25 paiyzǵa azaiyp, Dúniejúzilik densaýlyq saqtaý uiymy belgilegen maqsatty kórsetkishke qol jetkizilgen.
Ministr meditsinalyq kómektiń qoljetimdiligin arttyrý, alǵashqy meditsinalyq-sanitarlyq kómekti jetildirý, skrining baǵdarlamalaryn keńeitý jáne ana men bala densaýlyǵyn qorǵaý qyzmetin jańǵyrtý baǵytyndaǵy jumystar týraly baiandady.
Onkologiialyq qyzmetti damytý sharalary da jalǵasyp keledi. Astana qalasyndaǵy jańa onkologiialyq keshen bazasynda Protondy terapiia ortalyǵy ashylǵan. Sondai-aq Qyzylorda jáne Aqtaý qalalarynda eki jańa PET/KT kesheni iske qosyldy. Budan bólek, barlyq óńirde sarapshylyq endoskopiia ortalyqtarynyń jumysy jolǵa qoiylyp, Ulttyq ǵylymi onkologiia ortalyǵy men aimaqtardaǵy birqatar meditsinalyq nysannyń qurylysy aiaqtalǵan.
Kezdesýde mindetti áleýmettik meditsinalyq saqtandyrý júiesindegi qarjyny baqylaýdy kúsheitý máselesi de kóterildi. Bul baǵytta qarajattyń maqsatty jumsalýyn baqylaý júiesin avtomattandyrý jáne meditsinalyq qyzmet kórsetýshilerge qoiylatyn talaptardy kúsheitý josparlanyp otyr.
Ministrliktiń málimetinshe, Memleket basshysynyń tapsyrmasyna sáikes densaýlyq saqtaý salasynyń biryńǵai tsifrlyq infraqurylymyn qalyptastyrý jumystary júrgizilýde. Jekelegen aqparattyq júielerdi E-Densaulyq platformasyna biriktirý qolǵa alynǵan.
Sonymen qatar sońǵy eki jylda farmatsevtika ónerkásibine tartylǵan investitsiialar kólemi 2,3 esege, al dári-dármek eksporty 1,9 esege artqan. Dárilik zattardyń 400-den astam túrin óndirý boiynsha jalpy quny 316,3 milliard teńgege baǵalanatyn alty investitsiialyq kelisim jasalǵan.
Kezdesý sońynda Prezident meditsinalyq qyzmet sapasyn arttyrý, saladaǵy qarjylyq tártipti kúsheitý, meditsina mamandaryn daiarlaý júiesin jetildirý, tsifrlyq jańǵyrtýdy jedeldetý jáne otandyq farmatsevtika ónerkásibin damytý jóninde birqatar tapsyrma berdi.
