Foto: QMA
Qarjylyq monitoring agenttigi Qazaqstan Respýblikasynyń Bas prokýratýrasymen birlesip jáne TELE2 uialy bailanys operatorynyń kiberqaýipsizdik mamandarynyń qatysýymen azamattardyń derekteri men qarajatyn urlaýǵa baǵyttalǵan qylmystyq toptyń qyzmetin toqtatty, dep habarlaidy Ult.kz.
Vedomstvo málimetinshe, bul – TMD aýmaǵynda osyndai shemanyń alǵash ret áshkerelenýi.
Qaskóiler arnaiy qurylǵy – SMS-blasterdi paidalanyp, uialy bailanys operatorlarynyń bazalyq stantsiialarynyń jumysyn imitatsiialaǵan. Qurylǵy 300 metr radiýsta kúshti signal taratyp, paidalanýshylardyń telefondarynyń avtomatty túrde soǵan qosylýyna jáne qorǵanysy álsiz jelige aýysýyna sebep bolǵan. Sonyń nátijesinde abonentterge jappai jalǵan habarlamalar jiberilgen.
Atalǵan tehnologiia bailanys operatorlarynyń qorǵanysyn ainalyp ótip, saǵatyna 100 myńǵa deiin SMS taratýǵa múmkindik bergen. Qylmyskerler qurylǵylardy avtokólikterge ornatyp, olardy bazarlar men saýda-oiyn-saýyq ortalyqtary mańynda paidalanǵan.
Habarlamalar Beeline jáne Halyk Bank atynan jiberilgendei bolyp kóringen. Azamattarǵa bonýstardy aiyrbastaý usynylyp, siltemege ótken jaǵdaida olar fishingtik saittarǵa baǵyttalǵan. Onda paidalanýshylar jeke málimetterin, bank kartasynyń derekterin, CVV-kodyn jáne SMS arqyly kelgen rastaý kodtaryn engizgen.
Osy tásil arqyly alaiaqtar azamattardyń qupiia aqparattary men banktik qarajatyna qol jetkizgen.
Jedel is-sharalardyń nátijesinde qylmystyq top erte kezeńde anyqtalyp, ustaldy. Bul iri kólemdegi qarjylyq shyǵyndardyń aldyn alýǵa múmkindik berdi.
Qazirgi ýaqytta tórt kúdikti qamaýǵa alynyp, tergeý amaldary jalǵasyp jatyr.
Agenttik azamattardy tsifrlyq qaýipsizdik talaptaryn saqtaýǵa shaqyrady. Atap aitqanda, kúmándi siltemelerge ótpeý, tekserilmegen saittarda jeke derekterdi engizbeý jáne aqparatty tek resmi derekkózder arqyly tekserý qajet.
