QR Mádeniet jáne sport ministrligine qarasty til saiasaty komitetiniń tóraǵasy Ǵalymjan Meldeshov terminderge qatysty týyndaǵan daýly másele tóńireginde túsinikteme berdi, dep habarlaidy Sputnik Qazaqstan.
Aita ketsek, mádeniet jáne sport ministri Aqtoty Raiymqulovanyń halyq aldyndaǵy eseptik kezdesýinde terminder týraly aitqan sózi qoǵamda úlken daý týdyrdy. Ol úsh myńnan astam terminniń qaita bekitilgenin aitqan edi.
"Ministr bir-eki termin jóninde ǵana aitty. Tilimizge shet tilderden kelgen terminderdiń barlyǵyn aýystyrý maqsaty qoiylyp otyrǵan joq. Másele keibir terminder jóninde ǵana. Biz ózimiz kúndelikti qoldanbaityn, tipti onyń neni bildiretinin kópshilik aiyra almaityn sózderdi de termin retinde bekitkenbiz. Másele osyndai terminderdi qaitadan qaraý", - dedi Meldeshov Sputnik Qazaqstanǵa bergen suhbatynda.
Aitýynsha, qazirgi jahandaný dáýiri jalpy adamzattyń ómir súrý úlgisin, ózara qarym-qatynasyn ortaqtastyryp jatyr. Soǵan orai, ǵylym, turmys, tutyný salalary arqyly jańa ataýlar men terminder ómirimizge enýde.
"Álbette, biz tól tabiǵatymyzdy saqtaýymyz qajet. Ol minezimizden, mádenietimizden, ónerimizden kórinis taýyp jatyr. Al jańaǵy terminder bizdiń álemdi tanýymyzǵa, ǵylymdy igerýimizge kómektesetin sózder. Álemde barlyq zatty nemese jańalyqty jasaityn jeke dara ult joq. Adamzat balasy oilap tapqan jańalyq pen igilik barsha adamzatqa ortaq", - dedi til saiasaty komitetiniń tóraǵasy.
Ǵalymjan Meldeshov terminderdi bekitý jumysynyń retine toqtaldy. Onyń sózinshe, terminderdi bekitý birneshe kezeńnen turady.
"Alǵashqy kezeńde mekemeler nemese jeke tulǵalar terminkomǵa usynystaryn jiberedi. Bul usynystarda kórsetilgen sózderdiń beretin maǵynasyna lingvistikalyq saraptaý júrgizedi. Saraptaý jumysyna Ahmet Baitursynuly atyndaǵy Til bilimi institýtynyń ǵalymdary, basqa da ǵalymdar tartylady. Ekinshi kezeńde usynylǵan árbir sózdiń termin retinde qoldanylý barysy ázerbaijan, qyrǵyz, ózbek, túrik, tatar siiaqty týystas túrki tilderinde jáne aǵylshyn, frantsýz, orys tilderinde qalai ekendigi saraptalady. Úshinshi kezeńde bul usynystar Til saiasaty komitetiniń "TTermincom.kz" saitynda jariialanady. Mundaǵy maqsat olardy kópshilikke keńinen tanystyrý", - dedi ol.
Ol ótken jyly osy saitta arnaiy terminologiialyq alań ashyldy jáne bul alań áleýmettik jelilerge qosylǵanyn atap ótti.
"Mine, osyndai úsh kezeńnen ótkennen keiin ǵana usynystar respýblikalyq komissiiaǵa jiberiledi. Bilikti ǵalymdardan, mamandardan turatyn komissiia olarmen aldyn ala tanysady. Sodan keiin baryp komissiia otyrysy shaqyrylady. Osy otyrysta bekitilýge usynylǵan terminder talqylanyp baryp bekitilýge jiberiledi", - degen komitet tóraǵasy tilge jany ashityn kez-kelgen adamnyń pikirin tyńdaýǵa ázir ekenderin aitty.
