Foto:gov.kz
Aqtóbe oblysyndaǵy tikushaq apatynan qaza tapqan áskeri kim ekeni belgili boldy, - dep habarlaidy Qorǵanys ministrliginiń baspasóz qyzmeti.
Qorǵanys ministrligi málimetinshe, oqý-jattyǵý ushýy kezinde bolǵan aviatsiialyq apat saldarynan Áýe qorǵanysy kúshteri áskeri institýty aviatsiialyq eskadriliasynyń ofitser-nusqaýshysy, maior Batyr Qairatuly Orazymbetov qaiǵyly jaǵdaida qaza tapqan. Ol 1988 jyly dúniege kelgen.
Ofitser Áýe qorǵanysy kúshteri áskeri institýtyn 2009 jyly "ushaqtar, tikushaqtar jáne aviatsiialyq qozǵaltqyshtar" mamandyǵy boiynsha bitirgen.
Qyzmet barysynda Áýe qorǵanysy kúshterinde túrli laýazymdardan ótken. Mi-8 tikushaǵyn paidalanýda úlken tájiribesi bar, jalpy ushý ýaqyty 500 saǵattan asady.
"Qyzmet barysynda joǵary kásibilik pen adaldyq tanytqan. Biyl kóktemde bolǵan sý tasqynyna qarsy is-sharalarǵa qatysqan. Mereitoilyq jáne eńbek sińirgen jyldary úshin medaldarymen marapattalǵan", - dep jazylǵan habarlamada.
Marqum ofitser úilengen, artynda eki balasy qaldy.
Vedomstvo ókilderi zardap shekkender týraly da aqparatty jariialady.
"Apat jaǵdaiynda qoný kezinde zardap shekken áskeri institýt aviatsiialyq eskadriliasynyń komandiri maior Bibarys Ibraev pen oqý-jattyǵý aviatsiialyq ortalyǵynyń aǵa ushqysh-nusqaýshysy aǵa leitenant Rústem Nyǵmetov qazir oblystyq aýrýhanada jatyr. Jaǵdailary turaqty aýyr. Olarǵa barlyq qajet meditsinalyq kómek kórsetilip jatyr", - dep jazylǵan habarlamada.
Qaza tapqan ofitser men zardap shekkenderdiń týystaryna, jaqyndaryna jan-jaqty qoldaý kórsetilip jatqany aityldy.
