Foto: Instagram.com
Depýtat Gennadii Shipovskih TikTok-ty buǵattaý máselesin kóterdi. Aitýynsha, tanymal áleýmettik jeli jastardyń psihikasyna keri áser etýde. Depýtat óz pikirin Instagram paraqshasynda jariialady.
Sózbe-sóz:
"Búgingi tańda TikTok áleýmettik jelisi álemniń túkpir-túkpirinde úlken tanymaldyqqa ie. Bizdiń elde de bul jeliniń qoldanýshylar sany artpasa, kemip jatqan joq. Kórshi elge tiesili bul platformany kei kreativti jandar jasóspirimderdi bilimge, el tarihyna qyzyqtyrýǵa paidalanyp ta júr. Biraq ondai kontent sany ózge kontentpen salystyrǵanda shólge tastaǵan júziktei tym az. TikTok-taǵy kontenttiń basym bóligi qandai sarynda ekenin men aitpasam da, ózderińiz baiqap júrsizder. Sol kóńil kónshitpeitin kontenttiń kóptiginen Pavlovtyń: «Schaste - gde-to mejdý svobodoi i distsiplinoi» degeni oiǵa keledi. Iá, durys túsinip otyrsyzdar, men bul platformany «ishinara» shekteý jaiyna óz bes tiynymdy qystyrmaqpyn. Jastarymyzdyń nazaryn jaýlaǵan bul platformaǵa belgili bir shekteýler qoiýdy qoldaýymnyń sebebi ártúrli. Tarqata aitsaq:
Birinshiden, balalardyń psihikalyq densaýlyǵy alańdaýshylyq týǵyzady. TikTok-taǵy keibir kontent balalardyń minez-qulqyna teris áser etip, olardy jalǵan idealdarǵa jetelep, táýeldilikke ákelýi múmkin. Qyrǵyzstan osy maqsatta platformaǵa tyiym salyp, balalardyń psihikasyn qorǵaýǵa baǵyttalǵan qadam jasady. Búldirshin tárbielep otyrǵan áke retinde bul jaǵy meni qatty alańdatady.
Ekinshiden, kiberqaýipsizdik – qazirgi zamanǵy tsifrlyq álemniń basty máseleleriniń biri. AQSh, Frantsiia, basqa da elder TikTok-tyń paidalanýshylardyń derekterin jinaý ádisterine kúmándanyp, jelige shekteýler engizdi. Qazaqstanda da kiberqaýipsizdikke nazar aýdarý óte mańyzdy, óitkeni jeke jáne memlekettik málimetterdiń qorǵalýy ulttyq qaýipsizdikpen tikelei bailanysty.
Málimetterdiń qupiialylyǵy da úlken alańdaýshylyq týǵyzady. Kanada TikTok-ty derekterdiń qaýipsizdigine bailanysty shekteý sharalaryn engizgen. Bul platformanyń paidalanýshylar týraly málimetterdi jinaý jáne olardy saqtaý tásilderi kúmándi bolýy múmkin, al bul Qazaqstan úshin de ózekti másele.
Úshinshiden, qoǵamdyq turaqtylyqty saqtaý maqsatynda da shekteýler qajet bolýy múmkin. TikTok-ta jalǵan aqparat pen arandatýshy mazmundardyń taralýy eldegi áleýmettik turaqtylyqqa teris áser etýi yqtimal. Jalǵan aqparattyń keńinen taralýy qoǵamda dúrbeleń týdyryp, qoǵamdyq pikirdi burmalaýy múmkin.
Qorytyndylai kele, TikTok jelisine ishinara shekteý engizý Qazaqstan úshin mańyzdy qadam bolmaq degen oidamyn. Balalardyń psihikalyq saýlyǵyn qorǵaý, derekterdiń qaýipsizdigin qamtamasyz etý jáne qoǵamdaǵy turaqtylyqty saqtaý maqsatynda bul sharalar oryndy bolady dep esepteimin", - dep jazdy depýtat.
