Terroristik belsendilik aimaǵynan elimizge oralǵan áielderdiń 90% ońaltýdan ótti. Bul týraly QR Aqparat jáne qoǵamdyq damý ministrliginiń alqa otyrysynda Din isteri komitetiniń tóraǵasy Erjan Núkejanov málim etti, dep habarlaidy "Ult aqparat".
E.Núkejanov 2020 jylǵy din salasyndaǵy jumys nátijeleri jáne vedomstvo aldyna biyl qoiylǵan mindetter týrasynda aitty.
Komitet qyzmetiniń strategiialyq baǵyttary eń aldymen, el damýynyń zaiyrlylyq qaǵidattaryn nyǵaitýǵa, úilesimdi konfessiiaaralyq qatynastardy qamtamasyz etýge jáne halyq arasynda dini ekstremizm ideologiiasynyń taralýyna qarsy is-qimylǵa baǵdarlanǵan. Bul baǵyttar 2020 jyldyń sońynda qabyldanǵan din salasyndaǵy memlekettik saiasatty iske asyrýdyń 2021-2023 jyldarǵa arnalǵan keshendi josparynda kórsetilgen. Onyń sheńberinde eldegi dini ahýaldyń turaqtylyǵyn qamtamasyz etý jónindegi jumystar júrgiziletin bolady.
Komitet tóraǵasy atap ótkendei, 2020 jyly dini qyzmet salasyndaǵy 7 memlekettik qyzmettiń 6-aýy elektrondyq formatqa aýystyryldy. Endi olardy egov.kz portalynda alýǵa bolady. 2021 jyly osy saladaǵy barlyq memlekettik qyzmetterdi 100% avtomattandyrýdy qamtamasyz etý josparlanýda.
Sondai-aq ol destrýktivti dini aǵymdardyń 3 myńnan astam ustanýshysy qazaqstandyq qoǵamnyń dástúrli qundylyqtaryna qaita oralǵanyn, terroristik belsendilik aimaǵynan elimizge oralǵan áielderdiń 90% ońaltýdan ótkenin, sońǵy 3 jyl ishinde bilim berý mekemelerinde hidjab taǵý faktileriniń sany 12 eseden astam tómendegenin habardar etti. Budan bólek, din máseleleri boiynsha 229 aqparattyq-túsindirý tobynyń qyzmeti jóninde málim etildi.
E.Núkejanovtyń aitýynsha, dini radikaldy ideologiianyń internet arqyly taralýyna qarsy turýǵa erekshe kóńil bólinedi. 2020 jyly áleýmettik jelilerde destrýktivti dini aǵymdar ideologiiasyn nasihattaityn radikaldy toptarda tirkelgen qazaqstandyqtardyń sany 2019 jylmen salystarǵan 44% azaiyp, 21 myńnan astam radikaldy materialdar joiylǵan jáne buǵattalǵan.
Sonymen qatar vedomstvo tóraǵasy jemisti memlekettik-konfessiialyq yntymaqtastyq týraly aityp, pandemiia jáne karantin rejimi kezeńinde memleketke kórsetken qoldaýy úshin Qazaqstannyń dini birlestikteriniń ókilderine alǵys bildirdi.
