Temirtaý qalasy mańyndaǵy jasandy sý qoimalarynyń birine 14 jastaǵy bala batyp ketti. Qutqarýshylar shaqyrylǵannan keiin bir saǵat ótken soń er balanyń denesi sýdan shyǵaryldy, dep habarlaidy "Ult aqparat".
Qaiǵyly oqiǵa Temirtaý qalasynyń Aqtaý kentinde bolǵan. Aldyn ala málimet boiynsha, jasóspirim dosymen birge shomylýǵa tyiym salynǵan jasandy sý qoimasyna túsken.
«29 maýsym kúni keshke Temirtaý qalasynyń jasandy sý qoimasynda súńgýirler balanyń denesin alyp shyqty. Saǵat 19:02-de habarlama kelip tústi, saǵat 20:07-de balanyń denesi tabylyp, sýdan shyǵaryldy», - dep habarlady Qaraǵandy oblysy TJD baspasóz qyzmetinen.
Qutqarýshylar arnaiy jabdyqtalǵan oryndarda ǵana shomylýǵa bolatynyn eskertedi. Ásirese, sý mańynda balalar men jasóspirimderge erekshe nazar aýdarý kerek.
Qaraǵandy oblysynyń TJD balany sýdaǵy jazataiym oqiǵalardan qalai saqtaý kerektigin eske saldy:
- balalardy shomylýǵa qaraýsyz jibermeńiz.
- shomylýǵa tyiym salynǵan jerlerge sýǵa túsip, teris ádet qalyptastyrmańyz, jaman úlgi kórsetpeńiz.
- eger balanyń janynda bolmasańyz, balalar qońyraý shala alatyn shuǵyl qutqarý qyzmetteriniń telefondaryn jattap alýyn qadaǵalańyz.
- ata-analar árqashan balanyń qaida ekenin, kimmen jáne qashan úige oralýdy josparlaǵanyn bilýi kerek.
