«Temirlan» tarihi dramasy prokatqa shyǵady: halyqaralyq kinojoba kórermenge jol tartady

9 sáýir kúni Qazaqstanda «Temirlan» tarihi ekshn-dramasy keń prokatqa shyǵady. XIV ǵasyrdaǵy tarihi oqiǵalarǵa negizdelgen kartinada Mońǵol imperiiasynyń ydyraý kezeńi men Uly Jibek jolynyń quldyraýy aiasyndaǵy kúrdeli dáýir sýretteledi, dep habarlaidy Ult.kz. 

Film jelisi boiynsha, shaiqastarda shyńdalǵan Temir Barlas týǵan jerine oralyp, otbasynyń abyroiyn saqtap, jaqyndarynyń senimin aqtaýdy maqsat etedi. Alaida bul jolda ol bilikke umtylyp, qantógis pen satqyndyqqa toly aýyr tańdaýlarǵa tap bolady.

Halyqaralyq joba Ózbekstan, Qazaqstan jáne AQSh kinematografisteriniń birlesýimen túsirilgen. Filmniń rejisseri – Djeikob Shvarts. Ol týyndyny tarihi turǵydan barynsha shynaiy jetkizýge kúsh salǵanyn atap ótti.

Basty róldi somdaǵan Kristian Mortensen kartina stsenariiin jazýǵa da qatysqan. Onyń aitýynsha, filmde Ámir Temirdiń tek jaýlaýshy emes, áke, jar jáne tulǵa retindegi beinesin ashý mańyzdy bolǵan.

Temirlannyń odaqtasy ári qarsylasy Ámir Husaiynnyń rólin Mahesh Djadý, al Iliias Qoja beinesin Djoshýa Djo somdaǵan. Áieldiń basty rólin ózbek aktrisasy Iýldýz Radjabova oryndady.

Kartinaǵa qazaqstandyq tanymal akterler – Erkebulan Daiyrov, Sanjar Mádi, Áziz Beishenaliev jáne basqa da óner ieleri qatysqan. Sondai-aq filmde Nomad Stunts kaskaderler tobynyń jumysy erekshe oryn alady.

Túsirilim jumystary Qazaqstan men Ózbekstan aýmaǵynda júrgizildi. Sonyń ishinde Almaty mańynda Ámir Temirdiń ómirindegi mańyzdy «Laily shaiqas» kórinisteri túsirilgen.

Joba avtorlary bul týyndyny Ortalyq Aziia kinoindýstriiasy úshin biregei mýlti-mádeni bastama retinde baǵalaidy. Film Mystery Box prodakshn-kompaniiasynyń 7SABER jáne BWG Production stýdiialarymen birlesip túsirilgen.