Dúniejúzilik densaýlyq saqtaý uiymy koronavirýstyń Omikron shtamy mereke kúnderi odan saiyn tez taraýy múmkin ekenin eskertti.
"Merekeden bas tartý - ómirden airylýdan áldeqaida jaqsy", - dep málimdedi DDSU basshysy Tedros Gebreiesýs. Jenevadaǵy brifingte ol koronavirýstyń jańa túri tez taralatynyn, vaktsina qabyldaǵandar men virýspen buryn aýyrǵandarǵa da juǵatynyn aitty.
AQSh aýrýdy baqylaý jáne aldyn alý ortalyǵynyń málimetinshe, ótken aptada koronavirýs juqtyrǵandardyń 73 paiyzynan Omikron anyqtalǵan.
Koronavirýstyń jańa shtamy qarasha aiynyń sońynda Ońtústik Afrika Respýblikasynda tirkelgen.
Álem elderi Omikronnan saqtaný sharalaryn kúsheitip jatyr. Aq úidiń habarlaýynsha, prezident Djo Baiden úkimeti mereke kúnderi lokdaýn engizýdi josparlamaǵan.
